Ādhipateyyesu adhipatito āgataṃ ādhipateyyaṃ. Ettakomhi sīlena samādhinā paññāya vimuttiyā, na me etaṃ paṭirūpan"ti evaṃ attānaṃ adhipatiṃ jeṭṭhakaṃ katvā pāpassa akaraṇaṃ attādhipateyyaṃ nāma. Lokaṃ adhipatiṃ katvā akaraṇaṃ lokādhipateyyaṃ nāma. Lokuttaradhammaṃ adhipatiṃ katvā akaraṇaṃ dhammādhipateyyaṃ nāma. (56)
Kathāvatthūnīti kathākāraṇāni. Atītaṃ vā addhānanti atītaṃ dhammagatiṃ, atīte khandheti attho. Apica "yaṃ bhikkhave rūpaṃ atītaṃ niruddhaṃ vipariṇataṃ, `ahosī'ti tassa saṅkhā, `ahosī'ti tassa paññatti `ahosī'ti tassa samaññā, na tassa saṅkhā `bhavissatī'ti na tassa saṅkhā `atthī'ti evaṃ āgatena niruttipathasuttena cettha attho dīpetabbo. (57)
Vijjāti tamavijjhanaṭṭhena vijjā. Viditakaraṇaṭṭhenāpi vijjā. Pubbenivāsanussatiñāṇañhi uppajjamānaṃ pubbenivāsaṃ chādetvā ṭhitaṃ tamaṃ vijjhati, pubbenivāsañca viditaṃ karotīti vijjā. Cutūpapātāñāṇaṃ
Āsavānaṃ khaye ñāṇaṃ catusaccachādakaṃ tamaṃ vijjhati, catusaccadhammañca viditaṃ karotīti vijjā. (58)