[307] Diṭṭhadhammasukhavihārāyāti imasmiṃyeva attabhāve sukhavihāratthāya. Idha phalasamāpattijjhānāni, khīṇāsavassa aparabhāge nibbattitajjhānāni ca kathitāni. (5-1)

Ālokasaññaṃ manasikarotīti divā vā rattiṃ vā suriyacandapajotamaṇiādīnaṃ ālokaṃ ālokoti manasikaroti. Divāsaññaṃ adhiṭṭhātīti evaṃ manasikatvā divāti saññaṃ ṭhapesi. Yathā divā tathā rattinti yathā divā diṭṭho āloko, tatheva rattiṃ manasikaroti. yathā rattiṃ tathā divāti yathā rattiṃ āloko diṭṭho, evameva divā manasikaroti. Iti vivaṭena cetasāti evaṃ apihitena cittena. Apariyonaddhenāti samantato anaddhena. Sappabhāsanti saobhāsaṃ. Ñāṇadassanapaṭilābhāyāti ñāṇadassanapaṭilābhatthāya. Iminā kiṃ kathitaṃ? thīnamiddhavinodanaāloko kathito parikammaāloko vā. Imināpi kiṃ kathitaṃ hoti? khīṇāsavassa dibbacakkhuñāṇaṃ, tasmiṃ vā āgatepi anāgatepi pādakajjhānasamāpattimeva sandhāya "sappabhāsaṃ cittaṃ bhāvetī"ti vuttaṃ. (5-2)

Satisampajaññāyāti sattaṭṭhānikassa satisampajaññassa atthāya. Viditā vedanā uppajjantīti ādīsu khīṇāsavassa vatthu viditaṃ hoti ārammaṇaṃ viditaṃ vatthārammaṇaṃ viditaṃ. Vatthārammaṇaviditatāya evaṃ vedanā uppajjanti, evaṃ tiṭṭhanti, evaṃ nirujjhanti. Na kevalañca vedanāeva idha vuttā, saññādayopi, avuttā cetanādayopi, viditāva uppajjanti ceva tiṭṭhanti ca nirujjhanti ca. Apica vedanāya uppādo vidito hoti, upaṭṭhānaṃ viditaṃ hoti. Avijjāsamudayā vedanāsamudayo. Taṇhāsamudayā kammasamudayā phassasamudayā vedanāsamudayo. Nibbattilakkhaṇaṃ passantopi vedanākkhandhassa samudayaṃ passati. Evaṃ vedanāya uppādo vidito hoti. Kathaṃ vedanāya upaṭṭhānaṃ viditaṃ hoti? aniccato manasikaroto khayatūpaṭṭhānaṃ viditaṃ hoti. Dukkhato manasikaroto bhayatūpaṭṭhānaṃ viditaṃ hoti. Anattato manasikaroto suññatūpaṭṭhānaṃ viditaṃ hoti. Evaṃ vedanāya upaṭṭhānaṃ viditaṃ hoti, khayato bhayato suññato jānāti. Kathaṃ vedanāya atthaṅgamo vidito hoti? avijjānirodhā vedanānirodho .pe. Evaṃ vedanāya atthaṅgamo vidito hoti. Imināpi nayenettha attho veditabbo. (5-3)