Evaṃ pariyesantassa āhariyamānaṃ cīvaraṃ dūrato disvā "etaṃ manāpaṃ bhavissati, etaṃ amanāpan"ti evaṃ avitakketvā thūlasukhumādīsu yathāladdheneva santusanaṃ paṭilābhasantoso nāma.

Evaṃ laddhaṃ gaṇhantassāpi "ettakaṃ dupaṭassa bhavissati, ettakaṃ ekapaṭassā"ti attano pahonakamatteneva santusanaṃ mattapaṭiggahaṇasantoso nāma.

Cīvaraṃ pariyesantassa pana "asukassa gharadvāre manāpaṃ labhissāmī"ti acintetvā dvārapaṭipāṭiyā caraṇaṃ loluppavivajjanasantoso nāma.

Lūkhapaṇītesu yena kenaci yāpetuṃ sakkontassa yathāladdheneva yāpanaṃ yathālābhasantoso nāma.