[62] Āpāthakanisādī hotīti manussānaṃ āpāthe dassanaṭṭhāne nisīdati. Yattha te passanti, tattha ṭhito vaggulivattaṃ ovadati, pañcatapaṃ tappati, ekapādena tiṭṭhati, suriyaṃ namassati. Sāsane pabbajitopi samādinnadhutaṅgo sabbarattiṃ sayitvā manussānaṃ cakkhupathe tapaṃ karoti, sāyaṇhe mahāsayaneyeva cīvarakuṭiṃ karoti, suriye uggate paṭisaṃharati, manussānaṃ āgatabhāvaṃ ñatvā gaṇḍiṃ paharitvā cīvaraṃ matthake ṭhapetvā caṅkamaṃ otarati, sammajjaniṃ gahetvā vihāraṅgaṇaṃ sammajjati.

@4 cha.Ma., i.carati. 5 cha.Ma. ghaṇḍiṃ.

Attānanti attano guṇaṃ. Adassayamānoti ettha akāro nipātamattaṃ, dassayamānoti attho. Idampi me tapasminti idampi kammaṃ mameva tapasmiṃ, paccatte vā bhummaṃ, idaṃpi mama tapoti attho. So hi asukasmiṃ ṭhāne acelako atthi muttācāroti ādīni sutvā amhākaṃ esa tapo, amhākaṃ so antevāsikoti ādīni bhaṇati. Asukasmiṃ vā pana ṭhāne paṃsukūliko bhikkhu atthīti ādīni sutvā amhākaṃ esa tapo, amhākaṃ so antevāsikoti ādīni bhaṇati.