Oghāti vaṭṭasmiṃ satte ohananti osīdāpentīti oghā. Tattha pañcakāmaguṇiko rāgo kāmogho. Rūpārūpabhavesu chandarāgo bhavogho. Tathā jhānanikkanti sassatadiṭṭhisahagato ca rāgo. Dvāsaṭṭhidiṭṭhiyo diṭṭhogho. (31)

Vaṭṭasmiṃ yojentīti yogā. Te oghā viya veditabbā. (32)

Visaṃyojentīti visaṃyogā. Tattha asubhajjhānaṃ kāmayogavisaṃyogo. Taṃ pādakaṃ katvā adhigato anāgāmimaggo ekanteneva kāmayogavisaṃyogo nāma. Arahattamaggo bhavayogavisaṃyogo nāma. Sotāpattimaggo diṭṭhiyogavisaṃyogo nāma. Arahattamaggo avijjāyogavisaṃyogo nāma. (33)