Diṭaṭhavāditāti diṭṭhaṃ mayāti evaṃvāditā. Ettha ca taṃtaṃsamuṭṭhāpakacetanāvasena attho veditabbo. (43-46)

Attantapādicatukkavaṇṇanā

[314] Attantapādīsu paṭhamo acelako. Dutiyo orambhikādīsu aññataro. Tatiyo yaññayājako. Catuttho sāsane sammāpaṭipanno. (47)

Attahitāya paṭipannādīsu paṭhamo yo sayaṃ sīlādisampanno, paraṃ sīlādīsu na samādapeti āyasmā vakkalitthero viya. Dutiyo yo attanā na sīlādisampanno, paraṃ sīlādīsu samādapeti āyasmā upanando viya. Tatiyo yo neva attanā sīlādisampanno, na paraṃ sīlādīsu samādapeti devadatto viya. Catuttho yo attanā ca sīlādisampanno, parañca sīlādīsu samādapeti āyasmā mahākassapo viya. (48)