Saññojanānīti bandhanāni. Tehi pana bandhesu puggalesu rūpārūpabhave nibbattā sotāpannasakadāgāmino anto bandhā bahi sayitā nāma. Tesañhi kāmabhave bandhanaṃ. Kāmabhave anāgāmino bahi bandhā anto sayitā nāma. Tesañhi rūpārūpabhave bandhanaṃ. Kāmabhave sotāpannasakadāgāmino anto bandhā anto sayitā nāma. Rūpārūpabhave anāgāmino bahi bandhā bahi sayitā nāma. Khīṇāsavo sabbattha abandhano. (7-8)

Sikkhitabbaṃ padaṃ sikkhāpadaṃ. Sikkhākoṭṭhāsoti attho. Sikkhāya vā padaṃ sikkhāpadaṃ, adhicittaadhipaññāsikkhāya adhigamūpāyoti attho. Ayamettha saṅkhePo. Vitthārato pana sikkhāpadakathā vibhaṅgappakaraṇe sikkhāpadavibhaṅge āgatāyeva. (9)

Abhabbaṭṭhādipañcakavaṇṇanā

[316] "abhabbo āvuso khīṇāsavo bhikkhu sañcicca pāṇan"tiādi desanāsīsameva, sotāpannādayopi pana abhabbā. Puthujjanakhīṇāsavānaṃ nindāpasaṃsatthampi evaṃ vuttaṃ. Puthujjano nāma gāreyho, mātughātādīnipi karoti. Khīṇāsavo pana pāsaṃso, kunthakipīlakaghātādīnipi na karotīti. (10)