[331] Niddasavatthūnīti niddasādivatthūni. Niddaso bhikkhu, nibbīso, nittiṃso, niccattālīso, nippaññāso, bhikkhūti evaṃ vacanakāraṇāni. Ayaṃ kira pañho titthiyasamaye uppanno. Titthikā hi dasavassakāle mataṃ niggaṇṭhaṃ niddasoti vadanti. So kira puna dasavasso na hoti. Na kevalañca dasavassova. Navavassopi .pe. Ekavassopi na hoti. Eteneva nayena vīsativassādikālepi mataṃ nibbīso nittiṃso niccattālīso nippaññāsoti vadanti. Āyasmā ānando gāme piṇḍāya vicaranto taṃ kathaṃ sutvā vihāraṃ gantvā bhagavato ārocesi. Bhagavā āha:-

"na idaṃ ānanda titthikānaṃ adhivacanaṃ mama sāsane khīṇāsavassetaṃ adhivacananti. Khīṇāsavo hi dasavassakāle parinibbuto puna dasavasso na hoti. Na kevalañca dasavassova, navavassopi .pe. Ekavassopi. Na kevalañca ekavassova, dasamāsikopi .pe. Ekamāsikopi. Ekadivasikopi. Ekamuhuttikopi na hotieva. Kasmā? puna paṭisandhiyā abhāvā. Nibbīsādīsupi eseva nayo. Iti bhagavā mama sāsane khīṇāsavassetaṃ adhivacanan"ti

vatvā yehi kāraṇehi so niddaso hoti, tāni dassetuṃ satta niddasavatthūni desesi. Theropi tameva desanaṃ uddharitvā satta niddasavatthūni