Tattha micchattāti ayāthāvā micchāsabhāvā. Sammattāti yāthāvā sammāsabhāvā. (1-2)

[334] Kusītavatthūnīti kusītassa alasassa vatthūni, patiṭṭhā kosajjakāraṇānīti attho. Kammaṃ kattabbaṃ hotīti cīvaravicāraṇādikammaṃ kattabbaṃ hoti. Na viriyaṃ ārabhatīti duvidhampi viriyaṃ nārabhati. Appattassāti jhānavipassanāmaggaphaladhammassa appattassa pattiyā. Anadhigatassāti tasseva anadhigatassa adhigamanatthāya. Asacchikatassāti tasseva appaccakkhakatassa sacchikaraṇatthāya. Idaṃ paṭhamanti idaṃ handāhaṃ nipajjāmīti evaṃ osīdanaṃ paṭhamaṃ kusītavatthu. Iminā nayena sabbattha attho veditabbo. "māsācitaṃ maññe"ti ettha pana māsācitannāma tintamāso. Yathā tintamāso garuko hoti, evaṃ garukoti adhippāyo. Gilānavuṭṭhito hotīti gilāno hutvā pacchā vuṭṭhito hoti. (4)

[335] Ārambhavatthūnīti viriyakāraṇāni. Tesampi imināva nayena attho veditabbo. (5)