Paribbājakapajjhāyanavaṇṇanā

[78] Antevāsikamyatāti antevāsikamyatāya, amhe antevāsike icchanto. Evamāhāti "etu viññū puriso"ti ādimāha. Yoeva vo ācariyoti yoeva tumhākaṃ pakatiyā ācariyo. Uddesā no cāvetukāmoti attano anusāsaniṃ gāhāpetvā amhe amhākaṃ uddesato cāvetukāmo. Soyeva vo uddeso hotūti yo tumhākaṃ pakatiyā uddeso, so tumhākaṃyeva hotu, na mayaṃ tumhākaṃ uddesena anatthikā. Ājīvāti ājīvato. Akusalasaṅkhātāti akusalāti koṭṭhāsaṃ pattā. Akusalā dhammāti dvādasa akusalacittuppādadhammā Taṇhāyeva vā visesena. Sā hi punabbhavakaraṇato "ponobbhavikā"ti vuttā. Sadarathāti kilesadarathasampayuttā. Jātijarāmaraṇiyāti jātijarāmaraṇānaṃ paccayabhūtā. Saṃkilesikā dhammāti dvādasa akusalacittuppādā. Vodāniyāti samathavipassanādhammā. Te hi satte vodāpenti tasmā "vodāniyā"ti vuccanti. Paññāpāripūrinti maggapaññāpāripūriṃ. Vepullattañcāti phalapaññāvepullattaṃ, ubhopi vā etāni aññamaññavevacanāneva. Idaṃ vuttaṃ hoti "tato tumhe maggapaññañceva phalapaññañca diṭṭheva dhamme sayaṃ abhiññā sacchikatvā upasampajja viharissathā"ti. Evaṃ bhagavā paribbājake ārabbha attano ovādānusāsaniyā balaṃ dassento arahattanikūṭena desanaṃ niṭṭhāpesi.

[79] Yathā taṃ mārenāti yathā mārena pariyuṭṭhitacittā nisīdanti evameva tuṇhībhūtā .pe. Appaṭibhāṇā nisinnā.

Māro kira satthā ativiya gajjanto buddhabalaṃ dīpetvā imesaṃ paribbājakānaṃ dhammaṃ deseti, kadāci dhammābhisamayo bhaveyya, handāhaṃ pariyuṭṭhāmīti. So tesaṃ cittāni pariyuṭṭhāsi. Appahīnavipallāsānañhi cittaṃ mārassa yathākāmakaraṇīyaṃ hoti. Tepi mārena pariyuṭṭhitacittā thaddhaṅgapaccaṅgā viya tuṇhī appaṭibhāṇā nisīdiṃsu. Atha satthā ime paribbājakā ativiya nīravā hutvā nisinnā, kiṃ nukhoti āvajjanto mārena pariyuṭṭhitabhāvaṃ aññāsi. Sace pana tesaṃ maggaphaluppattihetu bhaveyya, māraṃ paṭibāhitvāpi bhagavā dhammaṃ deseyya, so pana tesaṃ natthi. "sabbepime tucchapurisā"ti aññāsi. Tena vuttaṃ "athakho bhagavato etadahosi sabbepīme moghapurisā"ti ādi.