Tagghāti ekaṃsavacanena nipāto, ekaṃseneva no bhante brāhmaṇā akkosanti paribhāsantīti vuttaṃ hoti. Attarūpāyāti attano anurūpāya. Paripuṇṇāyāti yathāruciṃ padabyañajanāni āropetvā āropetvā pūritāya. No aparipuṇṇāyāti antarā aṭṭhapitāya nirantaraṃ pavattāya.

Kasmā pana brāhmaṇā ime sāmaṇere akkosantīti. Appatiṭṭhatāya. Ime hi sāmaṇerā aggabrāhmaṇānaṃ puttā tiṇṇaṃ vedānaṃ pāragū jambudīpe brāhmaṇānaṃ antare pākaṭā sambhāvitā. Tesaṃ pabbajitattā aññe bahū brāhmaṇaputtā pabbajiṃsu. Athakho brāhmaṇā "appatiṭṭhā mayaṃ jātā"ti imāya appatiṭṭhatāya gāmadvārepi antogāmepi te disvā "tumhehi brāhmaṇasamayo bhinno muṇḍasamaṇakassa pacchato pacchato rasagiddhā hutvā vicarathā"ti ādīni ceva pāliyaṃ āgatāni "brāhmaṇova seṭṭho vaṇṇo"ti ādīni ca vatvā akkosanti. Sāmaṇerā tesu akkosantesupi kopaṃ vā āghātaṃ vā akatvā kevalaṃ bhagavatā puṭṭhattā "taggha no bhante brāhmaṇā akkosanti paribhāsantī"ti ārocesuṃ. Atha ne bhagavā akkosanākāraṃ pucchanto yathākathaṃ pana voti pucchati. Te ācikkhantā brāhmaṇā bhanteti ādimāhaṃsu.

Tattha seṭṭho vaṇṇoti jātigottādīnaṃ paññāpanaṭṭhāne brāhmaṇova seṭṭhoti dassenti. Hīnā aññe vaṇṇāti itare tayo vaṇṇā hīnā lāmakāti vadanti. Sukkoti paṇḍaro. Kaṇhoti kāḷako. Sujjhantīti

Brahmuno puttāti mahābrahmuno puttā. Orasā mukhato jātāti ure vasitvā mukhato nikkhantā, ure katvā saṃvaḍḍhitāti vā orasā. Brahmajāti brahmato nibbattā. Brahmanimmitāti brahmunā nimmitā. Brahmadāyādāti brahmuno dāyādā. Hīnamatthavaṇṇaṃ ajjhūpagatāti hīnaṃ vaṇṇaṃ ajjhūpagatā attha. Muṇḍake samaṇaketi nindantā jigucchantā vadanti, na muṇḍakamattañceva samaṇamattañca sandhāya. Ibbheti gahapatike. Kaṇheti kāḷake. Bandhūti mārassa bandhubhūte mārapakkhike. Pādāpacceti mahābrahmuno pādānaṃ apaccabhūte, pādato jāteti adhippāyo.