[116] Ubhayavokiṇṇesu vattamānesūti ubhayesu vokiṇṇesu missībhūtesu hutvā vattamānesu. Katamesu ubhayesūti kaṇhasukkesu dhammesu viññūgarahitesu ceva viññūpasatthesu ca. Yadettha brāhmaṇā evamāhaṃsūti ettha etesu kaṇhasukkadhammesu vattamānāpi brāhmaṇā yadetaṃ evaṃ vadanti "brāhmaṇova seṭṭho vaṇṇo"ti ādi. Tantesaṃ viññū nānujānantīti ye loke paṇḍitā, te nānumodanti, nappasaṃsantīti attho. Taṃ kissa hetu. Imesañhi vāseṭṭhāti ādimhi ayaṃ saṃkhepattho: yaṃ vuttaṃ nānujānantīti, taṃ kasmāti ce. Yasmā imesaṃ catunnaṃ vaṇṇanaṃ yo bhikkhu arahaṃ .pe. Sammadaññā vimutto, so tesaṃ aggamakkhāyati, teneva evarūpā tasmā tesaṃ viññū nānujānanti.

Arahanti ādipadesu cettha kilesānaṃ ārakattāhīhi kāraṇehi arahaṃ. Āsavānaṃ khīṇattā khīṇāsavo. Satta sekkhā puthujjanakalyāṇakā ca brahmacariyavāsaṃ vasanti nāma. Ayaṃ pana vuṭṭhavāsoti vusitvā. Catūhi maggehi catūsu saccesu parijānanādikaraṇīyaṃ kataṃ assāti katakaraṇīyo. Kilesabhāro ca khandhabhāro ca ohito assāti ohitabhāro. Ohitoti ohārito. Sundaro attho, sako vā atthoti sadattho, anuppatto sadattho etenāti anuppattasadattho.

Sammadaññā vimuttoti sammā hetunā kāraṇena jānitvā vimutto. Janetasminti jane etasmiṃ, imasmiṃ loketi attho. Diṭṭhe ceva dhamme abhisamparāyañcāti idhattabhāve ca parattabhāve ca.

[117] Anantarāti antaravirahitā, attano kulena sadisāti attho. Anuyantāti vasavattino. Nipaccakāranti mahallakatarā nipaccakāraṃ dassenti. Daharatarā abhivādanādīni karonti. Tattha sāmīcikammanti taṃtaṃvattakaraṇādi anucchavikakammaṃ.