[118] Niviṭṭhāti abhiniviṭṭhā acalaṭṭhitā. Kassa pana evarūpā saddhā hotīti. Sotāpannassa. So hi niviṭṭhasaddho asinā sīse chijjamānepi buddho abuddhoti vā, dhammo adhammoti vā, saṃgho asaṃghoti vā na vadati. Patiṭṭhitasaddhova hoti sūrambaṭṭho viya.

So kira satthu dhammadesanaṃ sutvā sotāpanno hutvā gehaṃ agamāsi. Atha māro dvattiṃsavaralakkhaṇapaṭimaṇḍitaṃ buddharūpaṃ māpetvā tassa gharadvāre ṭhatvā "satthā āgato"ti sāsanaṃ pahiṇi. Sūro cintesi "ahaṃ idāneva satthu santike dhammaṃ sutvā āgato, kiṃ nu kho bhavissatī"ti upasaṅkamitvā satthu saññāya vanditvā aṭṭhāsi. Māro āha "ambaṭṭha yaṃ te mayā `rūpaṃ aniccaṃ .pe. Viññānaṃ aniccan'ti kathitaṃ, taṃ dukkathitaṃ. Anupadhāretvāva hi mayā etaṃ vuttaṃ. Tasmā tvaṃ' rūpaṃ niccaṃ .pe. Viññāṇaṃ niccan'ti gaṇhāhī"ti. Sūro cintesi "aṭṭhānametaṃ yaṃ buddhā anupadhāretvā apaccakkhaṃ katvā kiñci katheyyuṃ, addhāyaṃ mayhaṃ vicchindajananatthaṃ māro āgato"ti. Tato naṃ "tvaṃ mārosī"ti āha. So musāvādaṃ kātuṃ nāsakkhi. "āma mārosmī"ti paṭijānāti. "kasmā āgatosī"ti. Tava saddhācālanatthanti āha. "kañha pāpima tvaṃ tāva eko tiṭṭha, tādisānaṃ mārānaṃ sataṃpi sahassaṃpi satasahassaṃpi mama saddhaṃ

@3 cha.Ma., i. chejjamānepi 4 cha.Ma. so Cāletuṃ asamatthaṃ, maggena āgatasaddhā nāma thirā silāpaṭhaviyaṃ patiṭṭhitasineru viya acalā hoti, kiṃ tvaṃ etthā"ti accharaṃ pahari. So ṭhātuṃ asakkonto tattheva antaradhāyi. Evarūpaṃ saddhaṃ sandhāyetaṃ vuttaṃ "niviṭṭhā"ti.