Kati nesaṃ vīthiyoti ettha pana ajavīthi nāgavīthi govīthīti tisso vīthiyo honti. Tattha ajānaṃ udakaṃ paṭikūlaṃ hoti, taṃ hi hatthināgānaṃ manāpaṃ. Gunnaṃ sītuṇhasamatāya phāsu hoti. Tasmā yaṃ kālaṃ candimasuriyā ajavīthiṃ ārūhanti, tadā devo ekabindumpi na vassati. Yadā nāgavīthiṃ ārohanti, tadā bhinnaṃ viya nabhaṃ paggharati. Yadā govīthiṃ ārūhanti, tadā utusamatā sampajjati, candimasuriyā cha māse sineruto bahi nikkhamanti, cha māse anto vicaranti. Te hi āsāḷhamāse sinerusamīpena caranti. Tato pare dve māse nikkhamitvā bahi carantā paṭhamakattikamāse majjhena gacchanti. Tato cakkavāḷābhimukhā gantvā tayo māse cakkavāḷasamīpena caritvā puna nikkhamitvā citramāse majjhena gantvā tato apare māse sinerūbhimukhā pakkhanditvā puna āsāḷhe sinerusamīpena caranti.

Kittake ṭhāne ālokaṃ karontīti. Ekappahārena tīsu dīpesu ālokaṃ karonti. Kathaṃ? imasmiṃ hi dīpesuriyuggamanakālo pubbavidehe majjhantiko hoti, uttarakurūsu atthaṅgamanakālo, amaragoyāne majjhimayāmo. Pubbavidehamhi uggamanakālo uttarakurūsu majjhantiko hoti, amaragoyāne atthaṅgamanakālo, idha majjhimayāmo. Uttarakurūsu uggamanakālo amaragoyāne majjhantiko, idha atthaṅgamanakālo, pubbavidehe majjhimayāmo. Amaragoyānadīpe uggamanakālo idha majjhantiko, pubbavidehadīpe atthaṅgamanakālo, uttarakurūsu majjhimayāmoti.

Nakkhattāni tārakarūpānīti kattikādinakkhattāni ceva sesatārakarūpāni ca candimasuriyehi saddhiṃyeva pāturahesuṃ. Rattindivāti tato suriyatthaṅgamanato yāva aruṇuggamanā ratti, aruṇuggamanato yāva suriyatthaṅgamanā divāti evaṃ rattindivā paññāyiṃsu. Atha pañcadasa rattiyo aḍḍhamāso, dve aḍḍhamāsā māsoti evaṃ