[124] Padālatāti ekā madhurarasā bhaddalatā. Kalambakāti nāḷikā. Ahu vata noti madhurarasā vata no padālatā ahosi. Ahāyi vata noti sā no etarahi antarahitāti.

Akaṭṭhapākasālipātubhāvavaṇṇanā

[125] Akaṭṭhapākoti akaṭṭheyeva bhūmibhāge uppanno. Akaṇoti nikkoṇḍako. Athūsoti nitthūso. Sugandhoti dibbagandhaṃ vāyati. Taṇḍulapphaloti parisuddhaṃ paṇḍaraṃ taṇḍulapphalameva phalati. Pakkaṃ paṭiviruḷhanti sāyaṃ gahitaṭṭhānaṃ pāto pakkaṃ hoti, punaviruḷhaṃ pākatikameva gahitaṭṭhānaṃ na paññāyati. Nāpadānaṃ paññāyatīti alāyitaṃ hutvā anūnameva paññāyati.