[127] Adhammasammatanti taṃ paṃsukhipanādikaṃ adhammoti sammataṃ. Tadetarahi dhammasammatanti taṃ idāni dhammoti sammataṃ, dhammoti taṃ gahetvā vicaranti. Tathā hi ekaccesu janapadesu kalahaṃ kurumānā itthiyo "tvaṃ kasmā kathesi, yā gomayapiṇḍamattaṃpi nālatthā"ti vadanti. Pātabyatanti sevitabbataṃ. Sannidhikārakanti sannidhiṃ katvā. Apadānaṃ paññāyitthāti chinnaṭṭhānaṃ onameva hutvā paññāyittha. Saṇḍasaṇḍāti ekekasmiṃ ṭhāne kalāpabandhā viya gumbagumbā hutvā.

Sālivibhāgavaṇṇanā

[128] Mariyādaṃ ṭhapeyyāmāti sīmaṃ ṭhapeyyāma.

[129] Yatra hi nāmāti yo hi nāma. Pāṇinā pahariṃsūti tayo vāre vacanaṃ aggaṇhantaṃ pāṇinā pahariṃsu. Tadagge kho panāti taṃ aggaṃ katvā.