๔. จูฬโคปาลกสุตฺตวณฺณนา

[๓๕๐] เอวมฺเม สุตนฺติ จูฬโคปาลกสุตฺตํ. ตตฺถ อุกฺกเจลายนฺติ ๔- เอวํนามเก นคเร. ตสฺมึ กิร มาปิยมาเน รตฺตึ คงฺคาโสตโต มจฺโฉ ถลํ ปตฺโต, มนุสฺสา เจลานิ เตลปาติยํ ๕- เตเมตฺวา อุกฺกา กตฺวา มจฺฉํ คณฺหึสุ, นคเร นิฏฺฐิเต ตสฺส นามํ กโรนฺเต อเมฺหหิ นครฏฺฐานสฺส คหิตทิวเส เจลุกฺกาหิ มจฺโฉ คหิโตติ อุกฺกเจลาเตฺววสฺส นามํ อกํสุ. ภิกฺขู อามนฺเตสีติ ยสฺมึ ฐาเน นิสินฺนสฺส

@๔ อุกฺกเวลายนฺติ ปาลิ. อุปริ ปาโฐ ปน ฏีกาสเมโต ๕ สี. เตลจาฏิยํ สพฺพา คงฺคา ปากฏา หุตฺวา ปญฺญายติ, ตาทิเส วาลิกุสฺสเท คงฺคาติตฺเถ สายณฺหสมเย มหาภิกฺขุสํฆปริวุโต นิสีทิตฺวา มหาคงฺคํ ปริปุณฺณํ สนฺทมานํ โอโลเกนฺโต "อตฺถิ นุ โข อิมํ คงฺคํ นิสฺสาย โกจิ ปุพฺเพ วุฑฺฒิปริหานึ ปตฺโต"ติ อาวชฺชิตฺวา ปุพฺเพ เอกํ พาลโคปาลกํ นิสฺสาย อเนกสตสหสฺสา โคคณา อิมิสฺสา คงฺคาย อาวฏฺเฏ ปติตฺวา สมุทฺทเมว ปวิฏฺฐา, อปรํ ปน ปณฺฑิตโคปาลกํ นิสฺสาย อเนกสตสหสฺสโคคณสฺส โสตฺถิ ชาตา วุฑฺฒิ ชาตา อาโรคฺยํ ชาตนฺติ อทฺทส, ทิสฺวา อิมํ การณํ นิสฺสาย ภิกฺขูนํ ธมฺมํ เทเสสฺสามีติ จินฺเตตฺวา ภิกฺขู อามนฺเตสิ.