๒. สพฺพาสวสุตฺตวณฺณนา

[๑๔] เอวมฺเม สุตํ ฯเปฯ สาวตฺถิยนฺติ สพฺพาสวสุตฺตํ. ๑- ตตฺรายํ อนุปุพฺพปทวณฺณนา ๒-:- สาวตฺถีติ สาวตฺถสฺส อิสิโน นิวาสนฏฺฐานภูตา นครี ยถา กากนฺที มากนฺทีติ เอวํ ตาว อกฺขรจินฺตกา. อฏฺฐกถาจริยา ปน ภณนฺติ "ยํ กิญฺจิ มนุสฺสานํ อุปโภคปริโภคํ สพฺพเมตฺถ อตฺถีติ สาวตฺถี. สตฺถสมาโยเค จ กึ ภณฺฑํ อตฺถีติ ปุจฺฉิเต สพฺพมตฺถีติ วจนมุปาทาย สาวตฺถี.

สพฺพทา สพฺพูปกรณํ สาวตฺถิยํ สโมหิตํ

ตสฺมา สพฺพมุปาทาย สาวตฺถีติ ปวุจฺจติ.