อรหํ สมฺมาสมฺพุทฺโธติ ปททฺวเย ปน อารกตฺตา อรีนํ อารานญฺจ หตตฺตา ปจฺจยาทีนญฺจ อรหตฺตา ปาปกรเณ รหาภาวาติ อิเมหิ ตาว การเณหิ อรหนฺติ เวทิตพฺโพ.

สมฺมา สามญฺจ สพฺพธมฺมานํ พุทฺธตฺตา ปน สมฺมาสมฺพุทฺโธติ อยเมตฺถ สงฺเขโป, วิตฺถารโต ปเนตํ ปททฺวยํ วิสุทฺธิมคฺเค พุทฺธานุสฺสติวณฺณนายํ ปกาสิตํ.

ปริญฺญาตนฺตํ ตถาคตสฺสาติ เอตฺถ ปน เอตํ มญฺญนาวตฺถุ ปริญฺญาตํ ตถาคตสฺสาติปิ อตฺโถ เวทิตพฺโพ. ปริญฺญาตนฺตํ นาม ปริญฺญาตวารํ ปริญาตาวสานํ อนวเสสโต ปริญฺญาตนฺติ วุตฺตํ โหติ. พุทฺธานญฺหิ สาวเกหิ สทฺธึ กิญฺจาปิ เตน เตน มคฺเคน กิเลสปฺปหาเน วิเสโส นตฺถิ, ปริญฺญาย ปน อตฺถิ. สาวกา หิ จตุนฺนํ ธาตูนํ เอกเทสเมว สมฺมสิตฺวา นิพฺพานํ ปาปุณนฺติ, พุทฺธานํ ปน อนุปฺปมาณํปิ สงฺขารคตํ ญาเณน อทิฏฺฐมตุลิตํ อตีริตมสจฺฉิกตํ นตฺถิ.