เอตฺถ จ "เชตวเน"ติ วจนํ ปุริมสามิปริกิตฺตนํ. "อนาถปิณฺฑิกสฺส อาราเม"ติ ปจฺฉิมสามิปริกิตฺตนํ. กิเมเตสํ ปริกิตฺตเน ปโยชนนฺติ. ปุญฺญกามานํ ทิฏฺฐานุคตึ อาปชฺชนํ. ตตฺร หิ ทวารโกฏฺฐกปาสาทมาปเน ภูมิวิกฺกยลทฺธา อฏฺฐารสหิรญฺญโกฏิโย อเนกโกฏิอคฺฆนกา รุกฺขา จ เชตฺสฺส ปริจฺจาโค, จตุปญฺญาสโกฏิโย อนาถปิณฺฑิกสฺส. อิติ เตสํ ปริกิตฺตเนน เอว ๑- ปุญฺญกามา ปญฺญานิ กโรนฺตีติ ทสฺเสนฺโต อายสฺมา อานนฺโท อญฺเญปิ ปุญฺญกาเม เตสํ ทิฏฺฐานุคตึ อาปชฺชเน นิโยเชติ.

สพฺพาสวสํวรปริยายํ โว ภิกฺขเวติ กสฺมา อิทํ สุตฺตมภาสิ. เตสํ ภิกฺขูนํ อุปกฺกิเลสวิโสธนํ อาทึ กตฺวา อาสวกฺขยาย ปฏิปตฺติทสฺสนตฺถํ. ตตฺถ สพฺพาสวสํวรปริยายนฺติ สพฺเพสํ อาสวานํ สํวรการณํ สํวรภูตํ การณํ, เยน การเณน เต สํวริตา ปิทหิตา หุตฺวา อนุปฺปาทนิโรธสงฺขาตํ ขยํ คจฺฉนฺติ ปหียนฺติ นปฺปวตฺตนฺติ, ตํ การณนฺติ อตฺโถ. ตตฺถ อาสวนฺตีติ อาสวา, จกฺขุโตปิ ฯเปฯ มนโตปิ สนฺทนฺติ ปวตฺตนฺตีติ วุตฺตํ โหติ. ธมฺมโต ยาว โคตฺรภุํ โอกาสโต ยาว ภวคฺคํ สวนฺตีติ วา อาสวา, เอเต ธมฺเม เอตญฺจ โอกาสํ อนฺโต กริตฺวา ปวตฺตนฺตีติ อตฺโถ. อนฺโตกรณตฺโถ หิ อยํ อากาโร. จิรปฺปริวาสิยฏฺเฐน มทิราทโย อาสวา วิยาติปิ อาสวา. โลกสฺมึญฺหิ จิรปฺปริวาสิกา มทิราทโย อาสวาติ วุจฺจนฺติ. ยทิ จ จิรปฺปริวาสิกฏฺเฐน อาสวา, เอเตเยว ภวิตุมรหนฺติ. วุตฺตเญฺหตํ "ปุริมา ภิกฺขเว โกฏิ น ปญฺญายติ อวิชฺชาย อิโต ปุพฺเพ อวิชฺชา