สุตฺตนิกฺเขปวณฺณนา

อิทานิ "สพฺพธมฺมมูลปริยายนฺ"ติ อาทินา นเยน ภควตา นิกฺขิตฺตสฺส สุตฺตสฺส วณฺณนาย โอกาโส อนุปฺปตฺโต. สา ปเนสา สุตฺตวณฺณนา ยสฺมา สุตฺตนิกฺเขปํ วิจาเรตฺวา วุจฺจมานา ปากฏา โหติ, ตสฺมา สุตฺตนิกฺเขปํ ตาว วิจารยิสฺสาม. จตฺตาโร หิ สุตฺตนิกฺเขปา อตฺตชฺฌาสโย ปรชฺฌาสโย ปุจฺฉาวสิโก อตฺถุปฺปตฺติโกติ.

ตตฺถ ยานิ สุตฺตานิ ภควา ปเรหิ อนชฺฌิฏฺโฐ เกวลํ อตฺตโน อชฺฌาสเยเนว กเถติ. ๖- เสยฺยถีทํ:- อากงฺเขยฺยสุตฺตํ วตฺถสุตฺตํ มหาสติปฏฺฐานสุตฺตํ มหาสฬายตนวิภงฺคสุตฺตํ อริยวํสสุตฺตํ สมฺมปฺปธานสุตฺตนฺตหารโก อิทฺธิปาทอินฺทฺริยพลโพชฺฌงฺคมคฺคงฺคสุตฺตนฺตหารโกติ เอวมาทีนิ. เตสํ อตฺตชฺฌาสโย นิกฺเขโป.