ขชฺชมานนฺติ อุทราทีสุ นิสีทิตฺวา อุทรมํสํ โอฏฺฐมํสํ อกฺขิกุฏาทีนิ ลุญฺจิตฺวา ขาทิยมานํ. สมํสโลหิตนฺติ เสสาวเสสมํสโลหิตยุตฺตํ.

อิติ อชฺฌตฺตํ วาติ เอวํ ขชฺชมานาทิปริคฺคณฺหเนน ยาว จุณฺณกภาวา อตฺตโน วา กาเย, ปรสฺส วา กาเย, กาเลน วา อตฺตโน, กาเลน วา ปรสฺส กาเย กายานุปสฺสี วิหรติ.

อิธ ปน ฐตฺวา นวสีวถิกา สโมธาเนตพฺพา. "เอกาหมตํ วา"ติอาทินา นเยน วุตฺตา สพฺพาปิ เอกา, "กาเกหิ วา ขชฺชมานนฺ"ติอาทิกา เอกา, "อฏฺฐิกสงฺขลิกํ สมํสโลหิตํ นหารุสมฺพนฺธนฺ"ติ เอกา, "นิมฺมํสโลหิตมกฺขิตํ นหารุสมฺพนฺธนฺ"ติ เอกา, "อปคตมํสโลหิตํ นหารุสมฺพนฺธนฺ"ติ เอกา, "อฏฺฐิกานิ อปคตสมฺพนฺธนานี"ติอาทิกา เอกา, "อฏฺฐิกานิ เสตานิ สงฺขวณฺณปฏิภาคานี"ติ เอกา, "ปุญฺชกิตานิ เตโรวสฺสิกานี"ติ เอกา, "ปูตีนิ จุณฺณกชาตานี"ติ เอกา.