อิเมสุ จตูสุ ปุคฺคเลสุ รูปปฺปมาโณปิ ภควโต อาโรหปริณาหสณฺฐาน- ปาริปูริวณฺณโปกฺขรตํ อสีติอนุพฺยญฺชนปฏิมณฺฑิตตฺตา นานารตนจิตฺตมิว สุวณฺณมหาปฏํ ทฺวตฺตึสมหาปุริสลกฺขณสมากิณฺณตาย ตาราคณสมุชฺชลํ วิย คคนตลํ สพฺพผาลิผุลฺลํ วิย จ โยชนสตุพฺเพธํ ปาริฉตฺตกํ อฏฺฐารสรตนุพฺเพธํ พฺยามปฺปภาปริกฺเขปสสฺสิรีกํ อโนปมสรีรํ ทิสฺวา สมฺมาสมฺพุทฺเธเยว ปสีทติ.

โฆสปฺปมาโณปิ ภควตา กปฺปสตสหสฺสาธิกานิ จตฺตาริ อสงฺเขยฺยานิ ทส ปารมิโย ทส อุปปารมิโย ทส ปรมตฺถปารมิโย ปูริตา, องฺคปริจฺจาโค ปุตฺตทารปริจฺจาโค รชฺชปริจฺจาโค ธนปริจฺจาโค ๑- นยนปริจฺจาโค จ กโตติอาทินา นเยน ปวตฺตํ โฆสํ สุตฺวา สมฺมาสมฺพุทฺเธเยว ปสีทติ.

ลูขปฺปมาโณปิ ภควโต จีวรลูขํ ทิสฺวา "สเจ ภควา อคารํ อชฺฌาวสิตฺถ, กาสิวตฺถเมว อธารยิสฺส. ปพฺพชิตฺวา ปนาเนน สาณปํสุกูลจีวเรน สนฺตุสฺสมาเนน ภาริยํ กตนฺ"ติ สมฺมาสมฺพุทฺเธเยว ปสีทติ. ปตฺตลูขํปิ ทิสฺวา "อิมินา อคารํ อชฺฌาวสตา ๒- รตฺตวรสุวณฺณภาชเนสุ จกฺกวตฺติโภชนารหํ สุคนฺธสาลิโภชนํ ปริภุตฺตํ, ปพฺพชิตฺวา ปน ปาสาณมยํ ปตฺตํ อาทาย อุจฺจนีจกุลทฺวาเรสุ สปทานํ ปิณฺฑาย จริตฺวา ลทฺธปิณฺฑิยาโลเปน สนฺตุสฺสมาโน ภาริยํ กโรตี"ติ สมฺมาสมฺพุทฺเธเยว ปสีทติ. เสนาสนลูขํ ทิสฺวาปิ "อยํ อคารํ อชฺฌาวสนฺโต ติณฺณํ อุตูนํ อนุจฺฉวิเกสุ ตีสุ ปาสาเทสุ ติวิธนาฏกปริวาโร ทิพฺพสมฺปตฺตึ วิย รชฺชสิรึ อนุภวิตฺวา อิทานิ ปพฺพชฺชูปคโต รุกฺขมูลเสนาสนาทีสุ ทารุผลกสิลา- ปฏฺฏวิทลมญฺจกาทีหิ ๓- สนฺตุสฺสมาโน ภาริยํ กโรตี"ติ สมฺมาสมฺพุทฺเธเยว ปสีทติ. ทุกฺกรการิกมสฺส ทิสฺวาปิ "ฉพฺพสฺสานิ นาม มุคฺคยูสกุลตฺถยูสหเรณุยูสาทีนํ ปสตมตฺเตน ยาเปสฺสติ, อปฺปาณกชฺฌานํ ฌายิสฺสติ, สรีเร จ ชีวิเต จ อนเปกฺโข วิหริสฺสติ, อโห ทุกฺกรการโก ภควา"ติ สมฺมาสมฺพุทฺเธเยว ปสีทติ.