ตตฺถ ขตฺติยปริสาติ ขตฺติยานํ สนฺนิปติตฺวา นิสินฺนฏฺฐานํ, เอส นโย สพฺพตฺถ. มารกายิกานํ ปน สนฺนิปติตฺวา นิสินฺนฏฺฐานํ มารปริสา เวทิตพฺพา, น มารานํ. สพฺพาปิ เจตา ปริสา อุคฺคฏฺฐานทสฺสนวเสน คหิตา. มนุสฺสา หิ "เอตฺถ ราชา นิสินฺโน"ติ ปกติวจนํปิ วตฺตุํ น สกฺโกนฺติ, กจฺเฉหิ เสทา มุจฺจนฺติ. เอวํ อุคฺคา ขตฺติยปริสา. พฺราหฺมณา ตีสุ เวเทสุ กุสลา โหนฺติ, คหปตโย นานาโวหาเรสุ เจว อกฺขรจินฺตาย จ. สมณา สกวาทปรวาเทสุ กุสลา โหนฺติ. เตสํ มชฺเฌ ธมฺมกถากถนํ นาม อติวิย ภาโร. อมนุสฺสาปิ อุคฺคา โหนฺติ. อมนุสฺโสติ หิ วุตฺตมตฺเตปิ มนุสฺสานํ สกลสรีรํ สงฺกมฺปติ, ตสฺส ๑- รูปํ วา ทิสฺวา สทฺทํ วา สุตฺวา สตฺตา วิสญฺญิโนปิ ๒- โหนฺติ. เอวํ อมนุสฺสปริสา อุคฺคา. ตาสุปิ ธมฺมกถากถนนฺนาม อติวิย ภาโร. อิติ อุคฺคฏฺฐานทสฺสนวเสเนตา ๓- คหิตาติ เวทิตพฺพา.

อชฺโฌคาหตีติ อนุปวิสติ. อเนกสตํ ขตฺติยปริสนฺติ พิมฺพิสารสมาคมญาติ- สมาคมลิจฺฉวิสมาคมสทิสํ. อญฺเญสุปิ จกฺกวาเฬสุ ลพฺภติเยว. กึ ปน ภควา อญฺญานิ จกฺกวาฬานิปิ คจฺฉตีติ, อาม คจฺฉติ. กีทิโส หุตฺวา? ยาทิสา เต, ตาทิโสเยว. เตเนวาห "อภิชานามิ โข ปนาหํ อานนฺท อเนกสตํ ขตฺติยปริสํ อุปสงฺกมิตฺวา ๔- ตตฺถ ยาทิสโก เตสํ วณฺโณ โหติ, ตาทิสโก มยฺหํ วณฺโณ โหติ. ยาทิสโก เตสํ สโร โหติ, ตาทิสโก มยฺหํ สโร โหติ. ธมฺมิยา จ กถาย สนฺทสฺเสมิ สมาทเปมิ สมุตฺเตเชมิ สมฺปหํเสมิ. ภาสมานญฺจ มํ น ชานนฺติ `โก นุ โข อยํ ภาสติ เทโว วา มนุสฺโส วา'ติ. ธมฺมิยา จ กถาย สนฺทสฺเสตฺวา สมาทเปตฺวา สมุตฺเตเชตฺวา สมฺปหํเสตฺวา อนฺตรธายามิ. อนฺตรหิตญฺจ มํ น ชานนฺติ `โก นุ โข อยํ อนฺตรหิโต เทโว วา มนุสฺโส วา"ติ. ๕-

ขตฺติยา เกยูรงฺคมาลาคนฺธาทิวิภูสิตา นานาวิราควสนา อามุตฺตมณิกุณฺฑลา ๖- โมลีธรา โหนฺติ. กึ ภควาปิ เอวํ อตฺตานํ มณฺเฑติ. เตปิ ๗- โอทาตาปิ โหนฺติ กาฬาปิ มงฺคุรจฺฉวีปิ. ๘- กึ สตฺถาปิ เอวรูโป