ทุกฺกรการิกาทิสุทฺธิวณฺณนา

[๑๕๕] "อภิชานามิ โข ปนาหํ สาริปุตฺต จตุรงฺคสมนฺนาคตนฺ"ติ อิทํ กสฺมา อารทฺธํ? ปาฏิเยกฺกํ อนุสนฺธิวเสน อารทฺธํ. อยํ กิร สุนกฺขตฺโต ทุกฺกรการิกาย สุทฺธิ โหตีติ เอวํลทฺธิโก. อถสฺส ภควา มยา เอตสฺมึ อตฺตภาเว ฐตฺวา จตุรงฺคสมนฺนาคตํ ทุกฺกรํ กตํ, ทุกฺกรการโก นาม มยา สทิโส นตฺถิ. ทุกฺกรกาเรน สุทฺธิยา สติ อหเมว สุทฺโธ ภเวยฺยนฺติ ทสฺเสตุํ อิมํ เทสนํ อารภิ. อปิจ อยํ สุนกฺขตฺโต ทุกฺกรการิกาย ปสนฺโน, โสปสฺส ๑- ปสนฺนภาโว "อทฺทสา โข ภควา สุนกฺขตฺโต ลิจฺฉวิปุตฺโต อเจลํ โกรกฺขตฺติยํ จตุกุณฺฑิกํ ฉมานิกิณฺณํ ภกฺขสํ มุเขเนว ๒- ขาทนฺตํ มุเขเนว ๒- ภุญฺชนฺตํ, ทิสฺวานสฺส เอตทโหสิ `สาธุรูโป วต โภ อยํ ๓- สมโณ จตุกุณฺฑิโก ฉมานิกิณฺณํ ภกฺขสํ มุเขเนว ขาทติ, มุเขเนว ภุญฺชตี"ติเอวมาทินา ปาฏิกสุตฺเต ๔- อาคตนเยน เวทิตพฺโพ.

อถ ภควา อยํ ทุกฺกรการิกาย ปสนฺโน, มยา จ เอตสฺมึ อตฺตภาเว ฐตฺวา จตุรงฺคสมนฺนาคตํ ทุกฺกรํ กตํ, ทุกฺกรกาเร ปสีทนฺเตนาปิ อเนน มยิ ปสีทิตพฺพํ สิยา, โสปิสฺส ปสาโท มยิ นตฺถีติ ทสฺเสนฺโต ๕- อิทํ เทสนํ อารภิ.