@๓ ก. มหานที นาสฺส วฑฺฒิตุํ ทสฺสามิ. กุสลปกฺขโต อาคตวิตกฺกํ เมฆสมเย เมฆํ วิย สุเขตฺตํ ๑- สาลกลฺยาณโปตกํ วิย จ สีฆํ สีฆํ วฑฺเฒสฺสามี"ติ. โส ตถา กตฺวา อกุสลวิตกฺเก นิคฺคณฺหิ, กุสลวิตกฺเก วฑฺเฒสิ. เอวํ อิมินา โพธิสตฺตสฺส วิตกฺกนิคฺคณฺหนกาโล กถิโตติ เวทิตพฺโพ.

[๒๐๗] อิทานิ ยถาสฺส เต วิตกฺกา อุปฺปชฺชึสุ, ยถา จ เน นิคฺคเหสิ, ตํ ทสฺเสนฺโต ตสฺส มยฺหํ ภิกฺขเวติอาทิมาห. ตตฺถ อปฺปมตฺตสฺสาติ สติยา อวิปฺปวาเส ฐิตสฺส. อาตาปิโนติ อาตาปวิริยวนฺตสฺส. ปหิตตฺตสฺสาติ เปสิตจิตฺตสฺส. อุปฺปชฺชติ กามวิตกฺโกติ โพธิสตฺตสฺส ฉพฺพสฺสานิ ปธานํ ปทหโต รชฺชสุขํ วา อารพฺภ, ปาสาเท วา นาฏกานิ วา โอโรเธ วา กิญฺจิเทว วา สมฺปตฺติมารพฺภ กามวิตกฺโก นาม อุปฺปนฺนปุพฺโพ. ๒- ทุกฺกรการิกาย ปนสฺส อาหารูปจฺเฉเทน อธิมตฺตกสมาทานํ ๓- ปตฺตสฺส เอตทโหสิ "น สกฺกา อาหารูปจฺเฉเทน วิเสสํ นิพฺพตฺเตตุํ, ยนฺนูนาหํ โอฬาริกํ อาหารํ อาหาเรยฺยนฺ"ติ. โส อุรุเวลํ ปิณฺฑาย ปาวิสิ. มนุสฺสา "มหาปุริโส ปุพฺเพ อาหริตฺวา ทินฺนํปิ น คณฺหิ, อทฺธาสฺส อิทานิ มโนรโถ มตฺถกํ ปตฺโต, ตสฺมา สยเมว อาคโต"ติ ปณีตปณีตํ อาหารํ อุปหรึสุ. โพธิสตฺตสฺส อตฺตภาโว น จิรสฺเสว ปากติโก อโหสิ. ชราชิณฺณตฺตภาโว หิ สปฺปายโภชนํ ลภิตฺวาปิ ปากติโก น โหติ. โพธิสตฺโต ปน ทหโร. เตนสฺส สปฺปายโภชนํ ภุญฺชโต อตฺตภาโว น จิรสฺเสว ปากติโก ชาโต, วิปฺปสนฺนานิ อินฺทฺริยานิ, ปริสุทฺโธ ฉวิวณฺโณ, สมุคฺคตตาราคณํ วิย นภํ ปริปุณฺณทฺวตฺตึสมหาปุริสลกฺขณปฺปฏิมณฺฑิตํ สรีรํ อโหสิ. โส ตํ โอโลเกตฺวา "ตาว กิลนฺโต นาม อตฺตภาโว เอวํ ปฏิปากติโก ชาโต"ติ จินฺเตตฺวา อตฺตโน ปญฺญามหนฺตตาย เอวํ ปริตฺตกํปิ วิตกฺกํ คเหตฺวา กามวิตกฺโกติ อกาสิ.

ปณฺณสาลาย ปุรโต นิสินฺโน ๔- จมรรุรุปสทควยโรหิตมิคาทิเก มิคคเณ ๔- มนุญฺญสทฺทรวเน โมรวนกุกฺกุฏาทิเก ปกฺขิคเณ นีลุปฺปลกุมุทกมลาทิสญฺฉนฺนานิ ปลฺลลานิ นานากุสุมสญฺฉนฺนวิฏปา วนราชิโย มณิกฺขนฺธนิมฺมลชลวหํ ๕- นทึ