มิคลุทฺทโก หิ เอกทาปิ เตสํ สาขาภงฺเคน สรีรํ ปุญฺฉิตฺวา มนุสฺสคนฺธํ อปเนตฺวา โอกจรํ เอกสฺมึ ฐาเน ฐเปตฺวา โอกจาริกํ สห รชฺชุยา วิสฺสชฺชิตฺวา อตฺตานํ ปฏิจฺฉาเทตฺวา สตฺตึ อาทาย โอกจรสฺส สนฺติเก ติฏฺฐติ, โอกจาริกา มิคคณสฺส จรณฏฺฐานาภิมุขี คจฺฉติ. ตํ ทิสฺวา มิคา สีสานิ อุกฺขิปิตฺวา ติฏฺฐนฺติ, สาปิ สีสํ อุกฺขิปิตฺวา ติฏฺฐติ, เต "อมฺหากํ สมชาติกา อยนฺ"ติ โคจรํ คณฺหนฺติ. สาปิ ติณานิ ขาทนฺตี วิย สนิกํ อุปคจฺฉติ. อารญฺญโก ๔- ยูถปติ มิโค ตสฺสา วาตํ ลภิตฺวา สกปริสํ ๕- วิสฺสชฺชิตฺวา ตทภิมุโข โหติ.

สตฺตานญฺหิ นวนวเมว ปิยํ โหติ. โอกจาริกา อารญฺญกสฺส มิคสฺส อจฺจาสนฺนภาวํ อทตฺวา ตทภิมุขีว ปจฺฉโต ปฏิกฺกมิตฺวา โอกจรสฺส สนฺติกํ คจฺฉติ, ยตฺถ ยตฺถสฺส ๖- รชฺชุ ลคฺคติ, ตตฺถ ตตฺถ ขุเรน ปหริตฺวา โมเจติ, อารญฺญโก มิโค โอกจรํ ทิสฺวา โอกจาริกาย สมฺมตฺโต หุตฺวา โอกจเร อุสูยํ กตฺวา ปิฏฺฐึ นาเมตฺวา สีสํ กมฺเปนฺโต ติฏฺฐติ, ตสฺมึ ขเณ สตฺตึ ชิวฺหาย เลหนฺโตปิ "กึ เอตนฺ"ติ น ชานาติ, โอกจโรปิ สจสฺส อุปริภาเคน ตํ มิคํ ปหริตุํ สุขํ โหติ, ปิฏฺฐึ นาเมติ. สจสฺส เหฏฺฐาภาเคน ปหริตุํ สุขํ โหติ, หทยํ อุนฺนาเมติ. อถ ลุทฺทโก อารญฺญกํ มิคํ สตฺติยา ปหริตฺวา ตตฺเถว ฆาเตตฺวา มํสํ อาทาย คจฺฉติ. เอวเมว ยถา โส มิโค โอกจาริกาย สมฺมตฺโต โอกจเร อุสูยํ กตฺวา สตฺตึ ชิวฺหาย เลหนฺโตปิ กิญฺจิ น ชานาติ, ตถา อิเม สตฺตา

@๔ ฉ.ม. อารญฺญิโก เอวมุปริปิ ๕ ฉ.ม. สกภริยํ ๖ ฉ.ม. ยตฺถสฺสา อวิชฺชาย สมฺมตฺตา อนฺธภูตา กิญฺจิ อชานนฺตา รูปาทีสุ นนฺทิราคํ อุปคมฺม วฏฺฏทุกฺขสตฺติยา วธํ ลภนฺตีติ ภควา โอกจรํ นนฺทิราโคติ, ๑- โอกจาริกํ อวิชฺชาติ กตฺวา ทสฺเสติ. ๒-