[๒๒๕] อถ โข ภควาติ กสฺมา อารภิ? ผคฺคุนสฺส กิร เอตฺตกํ โอวาทํ กตฺวาปิ ๒- "ภิกฺขุนีสํสคฺคโต โอรมิสฺสามิ วิรมิสฺสามี"ติ จิตฺตํปิ น อุปฺปนฺนํ, ภควตา ปน สทฺธึ ปฏาณิ วิย ปฏิวิรุทฺโธ อฏฺฐาสิ, อถ ๓- ภควโต ยถา นาม ชิฆจฺฉิตสฺส โภชเน, ปิปาสิตสฺส ปานีเย, สีเตน ผุฏฺฐสฺส อุเณฺห, ทุกฺขิตสฺส สุเข ปตฺถนา อุปฺปชฺชติ, เอวเมว อิมํ ทุพฺพจํ ภิกฺขุํ ทิสฺวา ปฐมโพธิยํ สุพฺพจาปิ ๔- ภิกฺขู อาปาถํ อาคมึสุ. อถ เตสํ วณฺณํ กเถตุกาโม หุตฺวา อิมํ เทสนํ อารภิ.

ตตฺถ อาราธยึสูติ อาราธยึสุ คณฺหึสุ. ๕- เอกํ สมยนฺติ เอกสฺมึ สมเย. เอกาสนโภชนนฺติ เอกํ ปุเรภตฺตโภชนํ. สุริยุคฺคมนโต หิ ยาว มชฺฌนฺติกา ทสกฺขตฺตุํ ๖- ภุตฺตโภชนํปิ อิธ เอกาสนโภชนเมว ๗- อธิปฺเปตํ. อปฺปาพาธตนฺติ นิราพาธตํ. อปฺปาตงฺกตนฺติ นิทฺทุกฺขตํ. ลหุฏฺฐานนฺติ สรีรสฺส สลฺลหุกํ อุฏฺฐานํ. พลนฺติ กายพลํ. ผาสุวิหารนฺติ กายสฺส สุขวิหารํ. อิมินา กึ กถิตํ? ทิวา วิกาลโภชนํ ปชหาปิตกาโล กถิโต. ภทฺทาลิสุตฺเต ปน รตฺตึ วิกาลโภชนํ ปชหาปิตกาโล กถิโต. อิมานิ หิ เทฺว โภชนานิ ภควา น เอกปฺปหาเรน ปชหาเปสิ. กสฺมา? อิมานิ ๘- เทฺว โภชนานิ วฏฺเฏ สตฺตานํ อาจิณฺณานิ. สนฺติ กุลปุตฺตา สุขุมาลา. เต เอกโต เทฺวปิ โภชนานิ ปชหนฺตา กิลมนฺติ. ตสฺมา เอกโต อปชหาเปตฺวา เอกสฺมึ กาเล ทิวา วิกาลโภชนํ, เอกสฺมึ รตฺตึ วิกาลโภชนนฺติ วิสุํ ปชหาเปสิ. เตสุ อิธ ทิวา วิกาลโภชนํ ปชหาปิตกาโล

@๔ ฉ.ม. ปิ-สทฺโท น ทิสฺสติ ๕ ฉ.ม. คณฺหึสุ ปูรยึสุ