ยาวเทว อากิญฺจญฺญายตนูปปตฺติยาติ ยาว สฏฺฐิกปฺปสหสฺสายุปริมาเณ ๓- อากิญฺจญฺญายตนภเว อุปปตฺติ, ตาว ๔- สํวตฺตติ, น ตโต อุทฺธํ. เอวมยํ ปุนราวตฺตนกธมฺโมเยว, ยญฺจฏฺฐานํ ปาเปติ, ตํ ชาติชรามรเณหิ อปริมุตฺตเมว มจฺจุปาสปริกฺขิตฺตเมวาติ. ตโต ปฏฺฐาย จ ปน มหาสตฺโต ยถา นาม ฉาตชฺฌตฺตปุริโส มนุญฺญโภชนํ ลภิตฺวา สมฺปิยายมาโนปิ ภุญฺชิตฺวา ปิตฺตวเสน วา เสมฺหวเสน วา มุจฺฉิกาวเสน ๕- วา ฉฑฺเฑตฺวา ปุน เอกํ ปิณฺฑํ ภุญฺชิสฺสามีติ มนํ น อุปฺปาเทติ, เอวเมว อิมา สตฺตสมาปตฺติโย มหนฺเตน อุสฺสาเหน นิพฺพตฺเตตฺวาปิ ตาสุ อิมํ ปุนราวตฺติกาทิเภทํ อาทีนวํ ทิสฺวา ปุน อิมํ ธมฺมํ อาวชฺชิสฺสามิ วา สมาปชฺชิสฺสามิ วา อธิฏฺฐหิสฺสามิ วา วุฏฺฐหิสฺสามิ วา ปจฺจเวกฺขิสฺสามิ วาติ จิตฺตเมว น อุปฺปาเทสิ. อนลงฺกริตฺวาติ อลํ อิมินา อลํ อิมินาติ ปุนปฺปุนํ อนลงฺกริตฺวา. ๖- นิพฺพิชฺชาติ นิพฺพินฺทิตฺวา. อปกฺกมินฺติ อคมาสึ.

@๔ ฉ.ม. ตาวเทว ๕ ม. มจฺฉิกาวเสน, ฉ.ม. มกฺขิกาวเสน ๖ ฉ.ม. อลงฺกริตฺวา