[๓๗๘] อปฺปาณกนฺติ นิรสฺสาสกํ. กมฺมารคคฺคริยาติ กมฺมารสฺส คคฺครนาฬิยา. สีสเวทนา โหนฺตีติ กุโตจิ นิกฺขมิตุํ อลภมาเนหิ วาเตหิ สมุฏฺฐาปิตา พลวติโย สีสเวทนา โหนฺติ. สีสเวฐํ ทเทยฺยาติ สีสเวฐนํ ทเทยฺย. เทวตาติ โพธิสตฺตสฺส จงฺกมนโกฏิยํ, ปณฺณสาลปริเวณสามนฺตา จ อธิวตฺถา เทวตา.

ตทา กิร โพธิสตฺตสฺส อธิมตฺเต กายทาเห อุปฺปนฺเน มุจฺฉา อุทปาทิ. โส จงฺกเมว นิสินฺโน หุตฺวา ปปติ. ตํ ทิสฺวา เทวตา เอวมาหํสุ "วิหาโรเตฺวว โส อรหโต"ติ, "อรหนฺโต นาม เอวรูปา โหนฺติ มตกสทิสา"ติ ลทฺธิยา วทนฺติ. ตตฺถ ยา เทวตา "กาลกโต"ติ ๒- อาหํสุ, ตา คนฺตฺวา สุทฺโธทนมหาราชสฺส

อปรภาเค สมฺมาสมฺพุทฺธสฺส ธมฺมจกฺกํ ปวตฺเตตฺวา อนุปุพฺเพน ราชคหํ คนฺตฺวา กปิลวตฺถุํ อนุปฺปตฺตสฺส สุทฺโธทนมหาราชา ปตฺตํ คเหตฺวา ปาสาทํ อาโรเปตฺวา ยาคุขชฺชกํ ทตฺวา อนฺตราภตฺตสมเย เอตมตฺถํ อาโรเจสิ, ภควา ตุมฺหากํ ปธานกรณกาเล เทวตา อาคนฺตฺวา "ปุตฺโต เต มหาราช กาลกโต"ติ อาหํสูติ. กึ สทฺทหสิ มหาราชาติ. น ภควา สทฺทหินฺติ. อิทานิ มหาราช สุปินปฏิคฺคหณโต ปฏฺฐาย อจฺฉริยานิ ปสฺสนฺโต กึ สทฺทหิสฺสสิ, อหํปิ พุทฺโธ ชาโต, ตฺวํปิ พุทฺธปิตา ชาโต, ปุพฺเพ ปน มยฺหํ อปริปกฺเก ญาเณ โพธิจริยํ จรนฺตสฺส ธมฺมปาลกุมารกาเลปิ สิปฺปํ อุคฺคเหตุํ คตสฺส "ตุมฺหากํ ปุตฺโต ธมฺมปาลกุมาโร กาลกโต, อิทมสฺส อฏฺฐี"ติ เอฬกฏฺฐึ อาหริตฺวา ทสฺเสสุํ, ตทาปิ ตุเมฺห "มม ปุตฺตสฺส อนฺตรามรณํ นาม นตฺถิ, นาหํ สทฺทหามี"ติ อโวจุตฺถ มหาราชาติ อิมิสฺสา อตฺถุปฺปตฺติยา ภควา มหาธมฺมปาลชาตกํ กเถสิ.