โสปิ ตเถว ๑- ตมฺพปณฺณิทีปมฺหิ สาสเน ปติฏฺฐิเต เทวโลกโต จวิตฺวา ทกฺขิณาคิริวิหารสฺส ภิกฺขาจารคาเม เอกสฺมึ อมจฺจกุเล นิพฺพตฺโต ปพฺพชฺชาสมตฺถโยพฺพเน ๒- ปพฺพชิตฺวา เตปิฏกํ พุทฺธวจนํ อุคฺคเหตฺวา คณํ ปริหรนฺโต มหาภิกฺขุสํฆปริวุโต อุปชฺฌายํ ปสฺสิตุํ อคมาสิ, อถสฺส อุปชฺฌาโย สทฺธิวิหาริกํ โจเทสฺสามีติ เตปิฏกํ พุทฺธวจนํ อุคฺคเหตฺวา อาคเตน เตน สทฺธึ มุขํ ทตฺวา กถามตฺตํปิ น อกาสิ. โส ปจฺจูสสมเย วุฏฺฐาย เถรสฺส สนฺติกํ คนฺตฺวา "ภนฺเต ตุเมฺห มยิ คนฺถกมฺมํ กตฺวา ตุมฺหากํ สนฺติกํ ๓- อาคเต มุขํ ทตฺวา กถามตฺตํปิ น กริตฺถ, โก มยฺหํ โทโส"ติ ปุจฺฉิ. เถโร อาห "อาวุโส พุทฺธรกฺขิต เอตฺตเกเนว `ปพฺพชฺชากิจฺจํ เม มตฺถกํ ปตฺตนฺ'ติ สญฺญํ กโรสี"ติ. กึ กโรมิ ภนฺเตติ. คณํ วิโนเทตฺวา ตฺวํ ปปญฺจํ ฉินฺทิตฺวา เจติยปพฺพตวิหารํ ๔- คนฺตฺวา สมณธมฺมํ กโรหีติ. โส อุปชฺฌายสฺส โอวาเท ฐตฺวา สห ปฏิสมฺภิทาหิ อรหตฺตํ ปตฺวา ปุญฺญวา ราชปูชิโต หุตฺวา มหาภิกฺขุสํฆปริวาโร เจติยปพฺพตวิหาเร วสิ.

@๓ ฉ.ม. สนฺติเก ๔ สี. วาตกสิตปพฺพตวิหารํ

ตสฺมึ จ ๑- กาเล ติสฺสมหาราชา อุโปสถกมฺมํ กโรนฺโต เจติยปพฺพเต ราชเลเณ วสติ. โส เถรสฺส อุปฏฺฐากภิกฺขุโน สญฺญํ อทาสิ "ยทา มยฺหํ อยฺโย ปญฺหํ วิสฺสชฺเชสิ, ธมฺมํ วา กเถติ, ตทา เม สญฺญํ ทเทยฺยาถา"ติ. เถโรปิ เอกสฺมึ ธมฺมสฺสวนทิวเส ภิกฺขุสํฆปริวุโต ๒- กณฺฏกเจติยงฺคณํ อารุยฺห เจติยํ วนฺทิตฺวา กาลทุมฺพริรุกฺขมูเล ๓- อฏฺฐาสิ. อถ นํ เอโก ปิณฺฑปาติกตฺเถโร กาฬการามสุตฺตนฺเต ปญฺหํ ปุจฺฉิ. เถโร นนุ อาวุโส อชฺช ธมฺมสฺสวนทิวโสติ อาห. อาม ภนฺเต ธมฺมสฺสวนทิวโสติ. เตนหิ ปีฐกํ อาเนถ, อิเธว นิสินฺนา ธมฺมสฺสวนํ กริสฺสามาติ. อถสฺส รุกฺขมูเล อาสนํ ปญฺญเปตฺวา อทํสุ. เถโร ปุพฺพคาถา วตฺวา กาฬการามสุตฺตํ อารภิ. โสปิสฺส อุปฏฺฐากทหโร รญฺโญ สญฺญมทาสิ. ๔- ราชา ปุพฺพคาถาสุ อนิฏฺฐิตาสุเยว ปาปุณิ, ปตฺวา จ อญฺญาตกเวเสเนว ปริสนฺเต ฐตฺวา ติยามรตฺตึ ฐิตโกว ธมฺมํ สุตฺวา เถรสฺส อิทมโวจ ภควาติ วจนกาเล สาธุการํ อทาสิ. เถโร ญตฺวา กทา อาคโตสิ มหาราชาติ ปุจฺฉิ. ปุพฺพคาถาโอสารณกาเลเยว ภนฺเตติ. มหาราช ทุกฺกรนฺเต กตนฺติ. นยิทํ ภนฺเต ทุกฺกรํ, ยทิ ปน เม อยฺยสฺส ธมฺมกถํ อารทฺธกาลโต ปฏฺฐาย เอกปเทปิ อญฺญาวิหิตภาโว อโหสิ, ตมฺพปณฺณิทีปสฺส ปโตทยฏฺฐินิตุทนมตฺเตปิ ฐาเน สามิภาโว นาม เม มา โหตูติ สปถํ อกาสิ.