@๖ ฉ.ม. ธมฺมํ ๗ ฉ.ม. จตุปฺปทิกํ ๘ ฉ.ม. อาหริตฺวา ๙ ฉ.ม. กเถสิ เหฏฺฐุปฺปริยํ กโรนฺโต กเถติ, เตเนว นํ ภควา เอตทคฺเค ฐเปสิ "เอตทคฺคํ ภิกฺขเว มม สาวกานํ ภิกฺขูนํ จิตฺตกถิกานํ ยทิทํ กุมารกสฺสโป"ติ. ๑-

ตถา ยาย วา ตาย วา อปฺปมตฺติกาย ปญฺญาย สมนฺนาคโต ภิกฺขุ จตูหิ มาเสหิ จตุปฺปทิกํปิ คาถํ คเหตุํ น สกฺโกติ, มหาปญฺโญ ปน เอกปเท ฐตฺวา ปทสตํปิ ปทสหสฺสํปิ คณฺหาติ, อานนฺทตฺเถโร ปน มหาปญฺญตาย เอกปทุทฺธาเร ฐตฺวา สกึเยว สุตฺวา ปุน อปุจฺฉนฺโต สฏฺฐิปทสหสฺสานิ ปณฺณรส คาถาสหสฺสานิ วลฺลิยา ปุปฺผานิ อากฑฺฒิตฺวา คณฺหนฺโต วิย เอกปฺปหาเรเนว คณฺหาติ, คหิตคหิตํ ปาสาเณ เลขิตเลขา ๒- วิย, สุวณฺณฆเฏ ปกฺขิตฺตสีหวสา วิย จ คหิตากาเรเนว ติฏฺฐติ, เตเนว นํ ภควา เอตทคฺเค ฐเปสิ "เอตทคฺคํ ภิกฺขเว มม สาวกานํ ภิกฺขูนํ คติมนฺตานํ ยทิทํ อานนฺโท. สติมนฺตานํ. ธิติ มนฺตานํ. พหุสฺสุตานํ. อุปฏฺฐากานํ ยทิทํ อานนฺโท"ติ. ๓-

น หิ สกฺกา ยาย วา ตาย วา อปฺปมตฺติกาย ปญฺญาย สมนฺนาคเตน ภิกฺขุนา จตุปฏิสมฺภิทาปฺปเภทสฺส มตฺถกํ ปาปุณิตุํ, มหาปญฺเญน ปน สกฺกาติ มหาปญฺญตาย มหาโกฏฺฐิตตฺเถโร อธิคมปริปุจฺฉาสวนปุพฺพโยคานํ วเสน อนนฺตนยุสฺสทํ ปฏิสมฺภิทาปฺปเภทํ ปตฺโต, เตเนว นํ ภควา เอตทคฺเค ฐเปสิ "เอตทคฺคํ ภิกฺขเว มม สาวกานํ ภิกฺขูนํ ปฏิสมฺภิทาปฺปตฺตานํ ยทิทํ มหาโกฏฺฐิโต"ติ. ๔-

อิติ เถโร มหาปญฺญตาย ปญฺหํ สมุฏฺฐาเปตุํปิ นิจฺเฉตุํปิ ๕- อุภยํปิ สกฺโกติ, โส ทิวาฏฺฐาเน นิสีทิตฺวา สยเมว สพฺพปเญฺห สมุฏฺฐาเปตฺวา สยํ วินิจฺฉินนฺโต อิทํ สุตฺตํ อาทิโต ปฏฺฐาย มตฺถกํ ปาเปตฺวา "โสภนา วต อยํ ธมฺมเทสนา, เชฏฺฐภาติเกน ธมฺมเสนาปตินา สทฺธึ สํสนฺเทสฺสามิ, ตโต อยํ ทฺวินฺนํปิ อมฺหากํ เอกมติยา เอกชฺฌาสเยน ๖- ฐปิตา อติครุกา ภวิสฺสติ ปาสาณจฺฉตฺตสทิสา, จตุโรฆนิตฺถรณตฺถิกานํ ติตฺเถ ฐปิตนาวา วิย สคฺคคมนตฺถิกานํ ๗- สหสฺสยุตฺตอาชญฺญรโถ วิย พหูปการา ภวิสฺสตี"ติ ทิฏฺฐสํสนฺทนตฺถํ ปญฺหํ ปุจฺฉิ. เตน วุตฺตํ "ตาสุ อิธ ทิฏฺฐสํสนฺทนาปุจฺฉา อธิปฺเปตา"ติ.