8. Madhupiṇḍikasuttavaṇṇanā

[199] Evamme sutanti madhupiṇḍikasuttaṃ.

Tattha mahāvananti. Himavantena saddhiṃ ekābaddhaṃ aropitaṃ jātivanaṃ, na yathā vesāliyaṃ ropitāropitamissakaṃ. Divāvihārāyāti divā paṭisallānatthāya. Veluvalaṭṭhikāyāti taruṇaveluvarukkhassa. Daṇḍapāṇīti na jarādubbalatāya daṇḍahattho. Ayaṃ hi taruṇova paṭhamavaye ṭhito, daṇḍacittatāya pana suvaṇṇadaṇḍaṃ gahetvā vicarati, tasmā daṇḍapāṇīti vutto. Jaṅghāvihāranti jaṅghākilamathavinodanatthaṃ jaṅghācāraṃ. Anucaṅkamamāno anuvicaramānoti vanadassanapabbatadassanādīnaṃ atthāya ito cito ca vicaramāno. Abhinikkhamanto kiresa nikkhamitvā evaṃ vicarati. Daṇḍamolubbhāti daṇḍaṃ olumbitvā gopālakadārako viya daṇḍaṃ purato ṭhapetvā daṇḍamatthake dve hatthe patiṭṭhāpetvā piṭṭhipāṇiṃ hanukena uppīḷetvā ekamantaṃ aṭṭhāsi.

[200] Kiṃvādīti kiṃdiṭṭhiko. Kimakkhāyīti kiṃ katheti. Ayaṃ rājā bhagavantaṃ avanditvāva paṭisanthāramattakameva katvā pañhaṃ pucchati. Taṃ pana añātukāmatāya, acittīkārena pucchati. Kasmā? devadattassa pakkhiko kiresa, devadatto attano santikaṃ āgacchamāne tathāgate bhindati. So kira evaṃ vadeti "samaṇo gotamo amhākaṃ kulena saddhiṃ verī, na no kulassa vuḍḍhiṃ icchati, bhaginīpi me cakkavattiparibhogā, taṃ pahāya `nassatesā'ti nikkhamitvā pabbaji, bhāgineyyopi me cakkavattibījanti ñatvā amhākaṃ kulassa vuḍḍhiyā atussanto `nassatetan'ti taṃpi daharakāleyeva pabbājesi. Ahaṃ panetena vinā vattituṃ asakkonto anupabbajito, evaṃ pabbajitaṃpi maṃ pabbajitadivasato paṭṭhāya na ujukehi akkhīhi oloketi, parisamajjhe bhāsantopi mahāpharasunā paharanto viya apāyiko