10. Cūḷaassapurasuttavaṇṇanā

[435] Evamme sutanti cūḷaassapurasuttaṃ. Tassa desanākāraṇaṃ purimasadisameva. Samaṇasāmīcipaṭipadāti samaṇānaṃ anucchavikā samaṇānaṃ anulomapaṭipadā.

[436] Samaṇamalānantiādīsu ete dhammā uppajjamānā samaṇe maline karonti malaggahite, tasmā "samaṇamalā"ti vuccanti. Etehi samaṇā dussanti padussanti, tasmā samaṇadosāti vuccanti. Ete hi uppajjitvā samaṇe kasaṭe niroje karonti milāpenti, tasmā samaṇakasaṭāti vuccanti. Āpāyikānaṃ ṭhānānanti apāye nibbattāpanakānaṃ kāraṇānaṃ. Duggativedanīyānanti duggatiyaṃ vipākavedanāya paccayānaṃ. Matajaṃ nāmāti manussā tikhiṇaṃ ayaṃ ayena sughaṃsitvā taṃ ayacuṇṇaṃ maṃsena saddhiṃ madditvā koñcasakuṇe khādāpenti, te uccāraṃ kātumasakkontā maranti. No ce maranti, paharitvā mārenti. Atha tesaṃ kucchiṃ phāletvā tāni udakena dhovitvā cuṇṇakaṃ gahetvā maṃsena saddhiṃ madditvā puna khādāpentīti evaṃ satta vāre khādāpetvā gahitena ayacuṇṇena āvudhaṃ karonti, susikkhitāva naṃ ayakārā bahuhatthakammamūlaṃ labhitvā karonti, taṃ matasakuṇato jātattā "matajan"ti vuccati, atitikhiṇaṃ hoti. Pītanissitanti udakapītaṃ ceva silāya ca sunighaṃsitaṃ. Saṅghāṭiyāti kosiyā. Sampārutanti pariyonaddhaṃ. Sampaliveṭhitanti samantato veṭhitaṃ.

[437] Rajojallikassāti rajojalladhārino. Udakorohakassāti divasassa tikkhattuṃ udakaṃ orohantassa. Rukkhamūsikassāti rukkhamūlavāsino. Abbhokāsikassāti abbhokāsavāsino ubbhaṭṭhakassāti uddhaṃ ṭhitakassa. Pariyāyabhattikassāti māsavārena vā aḍḍhamāsavārena vā bhuñjantassa. Sabbametaṃ bāhirasamayeneva kathitaṃ. Imasmiñhi sāsane cīvaradharo bhikkhu saṅghāṭikoti na vuccati. Rajojalladhāraṇādivatāni ca imasmiṃ sāsane natthiyeva. Buddhavacanassa buddhavacanameva nāmaṃ, na mantāti. Rukkhamūliko abbhokāsikoti ettakaṃyeva pana labbhati. Taṃpi bāhirasamayeneva kathitaṃ.