Anāthapiṇḍikassa kira gehe ayaṃ devaputto kammakāro ahosi. Seṭṭhissa hi gehe uposathadivasesu antamaso dāsakammakāre upādāya sabbo jano uposathiko hoti, ekadivasaṃ ayaṃ kammakāro ekakova pāto uṭṭhāya kammantaṃ gato, mahāseṭṭhī nivāpaṃ labhanamanussesu sallakkhento etassevekassa araññaṃ gatabhāvaṃ ñatvā assa sāyamāsatthāya nivāpaṃ adāsi. Bhattakārikā dāsī ekasseva bhattaṃ pacitvā araññato āgatassa bhattaṃ vaḍḍhetvā adāsi, kammakāro āha "aññesu divasesu imasmiṃ kāle gehaṃ ekasaddaṃ ahosi, ajja ativiya sannisinnaṃ, kiṃ nu kho etan"ti. Tassa sā ācikkhi "ajja imasmiṃ gehe sabbe manussā uposathikā, mahāseṭṭhī tuyhaṃ ekassa nivāpaṃ adāsī"ti. Evaṃ ammāti. Āma sāmīti. Imasmiṃ kāle uposathaṃ samādinnassa uposathakammaṃ hoti na hotīti mahāseṭṭhiṃ puccha ammāti. Tāya gantvā pucchito mahāseṭṭhī āha "sakalauposathakammaṃ na hoti, upaḍḍhauposathakammaṃ pana hoti, uposathiko hotū"ti. Kammakāro bhattaṃ abhuñjitvā mukhaṃ vikkhāletvā uposathiko hutvā vasanaṭṭhānaṃ gantvā nipajji. Tassa āhāraparikkhīṇakāyassa rattiṃ vāto kuppi, so paccūsasamaye kālaṃ katvā upaḍḍhauposathakammanissandena mahāvaṭṭaniaṭaviyaṃ nigrodharukkhadevaputto hutvā nibbatti. So taṃ pavattiṃ isīnaṃ ārocesi.
Isayo tumhehi mayaṃ buddho dhammo saṃghoti assutapubbaṃ sāvitaṃ, uppanno nu kho loke buddhoti. Āma bhante uppannoti. Idāni kuhiṃ vasatīti. Sāvatthiṃ nissāya jetavane bhanteti. Isayo tiṭṭhatha tāva tumhe mayaṃ satthāraṃ passissāmāti haṭṭhatuṭṭhā nikkhamitvā anupubbena kosambīnagaraṃ pāpuṇiṃsu, mahāseṭṭhino "isayo āgatā"ti paccuggamanaṃ katvā "sve amhākaṃ bhikkhaṃ gaṇhatha bhante"ti nimantetvā punadivase isigaṇassa mahādānaṃ adaṃsu. Isayo bhuñjitvāva gacchāmāti pucchiṃsu. Bhante tumhe aññasmiṃ kāle ekaṃpi māsaṃ dvepi tayopi cattāropi māse vasitvā gacchatha, yasmiṃ pana vāre hiyyo āgantvā ajjeva gacchāmāti vadatha, kiṃ idanti. Āma gahapatayo buddho loke uppanno, na kho pana sakkā jīvitantarāyo jānituṃ, tena mayaṃ turiyā gacchāmāti. Tenahi bhante mayaṃpi gacchāma, amhehi saddhiṃyeva gacchathāti. Tumhe agāriyā nāma mahājanā, tiṭṭhatha tumhe, mayaṃ puretaraṃ gamissāmāti nikkhamitvā ekaṭṭhāne dvepi divasāni avasitvā turitagamaneneva sāvatthiṃ patvā jetavanavihāre satthu santikameva agamaṃsu, satthu madhuradhammakathaṃ sutvā sabbeva pabbajitvā arahattaṃ pāpuṇiṃsu.