10. Māratajjanīyasuttavaṇṇanā

[506] Evamme sutanti māratajjanīyasuttaṃ. Tattha koṭṭhamanupaviṭṭhoti kucchiṃ pavisitvā antānaṃ anto anupaviṭṭho, pakkāsayaṭṭhāne nisinno. Garugaro viyāti garukagaruko viya thaddho pāsāṇapuñjasadiso. Māsācitaṃ maññeti māsabhattaṃ bhuttassa kucchi viya māsapūritapasibbako viya tintamāso viya cāti attho. Vihāraṃ pavisitvāti sace āhāradosena esa garubhāvo, ajjhokāse caṅkamituṃ na sappāyanti caṅkamā orohitvā paṇṇasālaṃ pavisitvā pakatipaññatte āsane nisīdi. Paccattaṃ yoniso manasākāsīti "kinnu kho etan"ti āvajjamāno attanoyeva upāyena manasi akāsi. Sace pana thero attano sīlaṃ āvajjetvā "yaṃ hiyyo vā pare vā parasuve vā paribhuttaṃ apakkamatthi, añño vā koci visabhāgadoso, sabbaṃ jīratu, phāsukaṃ hotū"ti hatthena kucchiṃ parāmasissa, māro pāpimā vilīyitvā agamissa. Thero pana tathā akatvā yoniso manasākāsi, mā tathā gataṃ vihesesīti yathā hi puttesu vihesitesu mātāpitaro vihesitāva honti, saddhivihārikaantevāsikesu vihesitesu ācariyupajjhāyā vihesitāva, janapade vihesite rājā vihesitova hoti, evaṃ tathāgatasāvake vihesite tathāgato vihesitova hoti. Tenāha "mā tathāgataṃ vihesesī"ti.

Paccaggaḷe aṭṭhāsīti paṭiaggaḷeva aṭṭhāsi. Aggaḷaṃ vuccati kavāṭaṃ, mukhe uggantvā paṇṇasālato nikkhamitvā bahi paṇṇasālāya kavāṭaṃ nissāya aṭṭhāsīti attho.

[507] Bhūtapubbāhaṃ pāpimāti kasmā imaṃ desanaṃ ārabhi? thero kira Cintesi "ākāsaṭṭhakadevatānaṃ tāva manussagandho yojanasate ṭhitānaṃ ābādhaṃ karoti. Vuttañhetaṃ `yojanasataṃ kho rājañña manussagandho deve ubbādhatī'ti.