[509] Anvāviṭṭhāti āvaṭṭitā. Pharitvā vihariṃsūti na kevalaṃ pharitvā vihariṃsu. Kakusandhassa pana bhagavato ovāde ṭhatvā ime cattāro brahmavihāre nibbattitvā jhānapadaṭṭhānaṃ vipassanaṃ vaḍḍhetvā arahatte patiṭṭhahiṃsu.

[510] Āgatiṃ vā gatiṃ vāti paṭisandhivasena āgamanaṭṭhānaṃ vā, cutivasena gamanaṭṭhānaṃ vā na jānāmi. Siyā cittassa aññathattanti somanassavasena aññathattaṃ bhaveyya. Saggaṃ lokaṃ upapajjantīti idhāpi purimanayenevattho veditabbo. Yathā hi pubbe vippaṭisārakaraṃ ārammaṇaṃ dasseti, evamidhāpi pasādakaraṃ. So kira tadā manussānaṃ dassanaṭṭhāne bhikkhū ākāse gacchante viya ākāse ṭhite viya pallaṅkena nisinne viya ākāse sūcikammaṃ karonte viya ākāse potthakaṃ vācente viya ākāse cīvaraṃ pasāretvā kāyaṃ utuṃ gaṇhāpente viya vuḍḍhapabbajite ākāsena carante viya taruṇasāmaṇere ākāse ṭhatvā pupphāni ocinante viya katvā dassesi. Manussā araññagatāpi vanagatāpi vihāragatāpi pabbajitānaṃ taṃ paṭipattiṃ disvā āgantvā aññesaṃ kathenti "bhikkhūsu antamaso sāmaṇerāpi evaṃmahiddhikā mahānubhāvā, etesaṃ dinnaṃ mahapphalaṃ nāma hoti, etesaṃ detha sakkarothā"ti. Tato manussā bhikkhusaṃghaṃ catūhi paccayehi sakkarontā bahuṃ puññaṃ katvā saggapathapūrakā ahesuṃ. Tena vuttaṃ "saggaṃ lokaṃ upapajjantī"ti.

[511] Etha tumhe bhikkhave asubhānupassino kāye viharathāti bhagavā sakalajambūdīpaṃ āhiṇḍanto antamaso dvinnaṃpi tiṇṇaṃpi bhikkhūnaṃ vasanaṭṭhānaṃ gantvā:-