Kosalānaṃ puraṃ rammaṃ dassaneyyaṃ manoramaṃ

dasahi saddehi avivittaṃ annapānasamāyutaṃ.

Vuḍḍhiṃ vepullataṃ pattaṃ iddhaṃ phītaṃ manoramaṃ

ālakamandāva devānaṃ sāvatthīpuramuttaman"ti. Tassaṃ sāvatthiyaṃ. Jetavaneti ettha attano paccatthikaṃ janaṃ jinātīti raññā vā attano paccatthikajane jite jātoti jeto. Maṅgalakamyatāya vā tassa evannāmameva katanti jeto. Jetassa vanaṃ jetavanaṃ. Tañhi jetena rājakumārena ropitaṃ saṃvaḍḍhitaṃ paripālitaṃ, so ca tassa sāmī ahosi. Tasmā jetavananti vuccati, tasmiṃ jetavane. Anāthapiṇḍikassa ārāmeti ettha sudatto nāma so gahapati mātāpitūhi katanāmavasena sabbakāmavasena sabbakāmasamiddhitāya pana vigatamaccheratāya karuṇādiguṇasamaṅgitāya ca niccakālaṃ anāthānaṃ piṇḍamadāsi, tena anāthapiṇḍikoti saṅkhyaṃ gato. Āramanti ettha pāṇino visesena vā pabbajitāti ārāmo, tassa pupphaphalādisobhanāya nātidūranāccāsannatādipañcavidhasenāsanaṅgasampattiyā tato tato āgamma ramanti abhiramanti anukkaṇṭhitā hutvā nivasantīti attho. Vuttappakārāya vā sampattiyā tattha tattha gatepi attano abbhantaraṃyeva