So hi anāthapiṇḍikena gahapatinā jetassa rājakumārassa hatthato aṭṭhārasahi hiraññakoṭīhi santhārena kīṇitvā aṭṭhārasahi hiraññakoṭīhi senāsanāni kārāpetvā aṭṭhārasahi hiraññakoṭīhi vihāramahaṃ niṭṭhapetvā evaṃ catupaññāsahiraññakoṭi pariccāgena buddhappamukhassa saṃghassa niyyādito. Tasmā "anāthapiṇḍikassa ārāmo"ti vuccati, tasmiṃ anāthapiṇḍikassa ārāme.
Ettha ca "jetavane"ti vacanaṃ purimasāmiparikittanaṃ. "anāthapiṇḍikassa ārāme"ti pacchimasāmiparikittanaṃ. Kimetesaṃ parikittane payojananti. Puññakāmānaṃ diṭṭhānugatiṃ āpajjanaṃ. Tatra hi davārakoṭṭhakapāsādamāpane bhūmivikkayaladdhā aṭṭhārasahiraññakoṭiyo anekakoṭiagghanakā rukkhā ca jetssa pariccāgo, catupaññāsakoṭiyo anāthapiṇḍikassa. Iti tesaṃ parikittanena eva puññakāmā paññāni karontīti dassento āyasmā ānando aññepi puññakāme tesaṃ diṭṭhānugatiṃ āpajjane niyojeti.
Sabbāsavasaṃvarapariyāyaṃ vo bhikkhaveti kasmā idaṃ suttamabhāsi. Tesaṃ bhikkhūnaṃ upakkilesavisodhanaṃ ādiṃ katvā āsavakkhayāya paṭipattidassanatthaṃ. Tattha sabbāsavasaṃvarapariyāyanti sabbesaṃ āsavānaṃ saṃvarakāraṇaṃ saṃvarabhūtaṃ kāraṇaṃ, yena kāraṇena te saṃvaritā pidahitā hutvā anuppādanirodhasaṅkhātaṃ khayaṃ gacchanti pahīyanti nappavattanti, taṃ kāraṇanti attho. Tattha āsavantīti āsavā, cakkhutopi .pe. Manatopi sandanti pavattantīti vuttaṃ hoti. Dhammato yāva gotrabhuṃ okāsato yāva bhavaggaṃ savantīti vā āsavā, ete dhamme etañca okāsaṃ anto karitvā pavattantīti attho. Antokaraṇattho hi ayaṃ ākāro. Cirapparivāsiyaṭṭhena madirādayo āsavā viyātipi āsavā. Lokasmiṃñhi cirapparivāsikā madirādayo āsavāti vuccanti. Yadi ca cirapparivāsikaṭṭhena āsavā, eteyeva bhavitumarahanti. Vuttañhetaṃ "purimā bhikkhave koṭi na paññāyati avijjāya ito pubbe avijjā