ettha tebhūmikañca kammaṃ avasesā ca akusalā dhammā. "diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāyā"ti ettha parūpavādavippaṭisāravadhabandhādayo ceva apāyadukkhabhūtā ca nānappakārā upaddavā. Te te panete āsavā yattha yathā āgatā, tattha tathā veditabbā.

Ete hi vinaye tāva "diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāyā"ti dvidhā āgatā. Saḷāyatane "tayome āvuso āsavā, kāmāsavo bhavāsavo avijjāsavo"ti tidhā āgatā. Aññesu ca suttantesu abhidhammesu ca te eva diṭṭhāsavena saha catudhā āgatā. Nibbedhikapariyāyena "atthi bhikkhave āsavā nirayagāminiyā, *- atthi āsavā tiracchānayonigāminiyā, atthi āsavā pittivisayagāminiyā, atthi āsavā manussalokagāminiyā, atthi āsavā devalokagāminiyā"ti pañcadhā āgatā. Chakkanipāte "atthi bhikkhave āsavā saṃvarā pahātabbā"ti ādinā nayena chadhā āgatā. Imasmiṃ pana sutte teyeva dassanapahātabbehi saddhiṃ sattadhā āgatā. Ayaṃ tāva āsavapade vacanattho ceva pabhedo ca.

@3 ka. aṇḍajaṃ, cha.Ma. abbaje 4 aṅ. catukka. 21/36/43-4 doṇasutta