@5 vinaYu. mahāvi. 1/39/26 pārājikakaṇḍa 6 aṅ. chakka. 22/334/463 nibbedhikasutta

@* pāli....gamaniyā evamuparipi (sayā) 7 aṅ. chakka. 22/334/463 (sayā)

Saṃvarapade pana saṃvariyatīti saṃvaro pidahati nivāreti pavattituṃ na detīti attho. Tathāhi "anujānāmi bhikkhave divā paṭisallīyantena davāraṃ saṃvaritvā paṭisallīyitun"ti, "sotānaṃ saṃvaraṃ brūmi paññāyete pithiyyare"ti ādīsu pidhānaṭṭhena saṃvaramāha. Svāyaṃ saṃvaro pañcavidho hoti sīlasaṃvaro satiñāṇakhantiviriyasaṃvaroti. Tattha "iminā pāṭimokkhasaṃvarena upeto"ti ayaṃ sīlasaṃvaro. Pāṭimokkhasīlañhi ettha saṃvaroti vuttaṃ. "cakkhundriye saṃvaramāpajjatī"ti ādīsu satisaṃvaro. Sati hettha saṃvaroti vuttā. "sotānaṃ saṃvaraṃ brūmi paññāyete pithiyyare"ti ayaṃ ñāṇasaṃvaro. Ñāṇañhettha pithiyyareti iminā pidhānaṭṭhena saṃvaroti vuttaṃ. "khamo hoti sītassa .pe. Uppannaṃ kāmavitakkaṃ nādhivāsetī"ti ādinā nayena idheva khantiviriyasaṃvarā āgatā. Tesañca "sabbāsavasaṃvarapariyāyan"ti iminā uddesena saṅgahitattā saṃvarabhāvo veditabbo.

Apica pañcavidhopi ayaṃ saṃvaro idha āgatoyeva, tattha khantiviriyasaṃvarā tāva vuttāyeva. "so tañca anāsanaṃ tañca agocaran"ti ayampanettha sīlasaṃvaro. "paṭisaṅkhā yoniso cakkhundriyasaṃvarasaṃvuto"ti ayaṃ satisaṃvaro. Sabbattha paṭisaṅkhā ñāṇasaṃvaro. Agahitagahaṇena pana dassanaṃ paṭisevanā bhāvanā ca ñāṇasaṃvaro. Pariyāyanti etena dhammāti pariyāyo, uppattiṃ nirodhaṃ vā gacchantīti vuttaṃ hoti. Ettāvatā "sabbāsavasaṃvarapariyāyan"ti ettha yaṃ vattabbaṃ, taṃ vuttaṃ hoti.