@3 Ma. mū 12/438/386 4 khu. dhamMa. 25/253/60 ujjhānasaññittheravatthu Jānato āsavā vaḍḍhantiyeva, tasmā yaṃ jānato passato āsavānaṃ khayo hoti, tadeva dassento āha yoniso ca manasikāraṃ ayoniso ca manasikāranti.

Tattha yoniso manasikāro nāma upāyamanasikāro pathamanasikāro, aniccādīsu aniccanti ādinā nayena saccānulomikena vā cittassa āvajjanā anvāvajjanā ābhogo samannāhāro manasikāro, ayaṃ vuccati yoniso manasikāro. Ayoniso manasikāroti anupāyamanasikāro uppathamanasikāro anicce niccanti dukkhe sukhanti anattani attāti asubhe subhanti ayoniso manasikāro uppathamanasikāro saccapaṭikkūlena vā cittassa āvajjanā anvāvajjanā ābhogo samannāhāro manasikāro ayaṃ vuccati ayoniso manasikāroti. Evaṃ yoniso manasikāraṃ uppādetuṃ jānato ayoniso manasikāro ca yathā na uppajjati, evaṃ passato āsavānaṃ khayo hoti.

Idāni imassevatthassa yuttiṃ dassento āha ayoniso bhikkhave .pe. Pahiyyantīti. Tena kiṃ vuttaṃ hoti. Yasmā ayoniso manasikaroto āsavā uppajjanti yoniso manasikaroto pahiyyanti tasmā jānitabbaṃ. Yoniso manasikāraṃ uppādetuṃ jānato ayoniso manasikāro ca yathā na uppajjati evaṃ passato āsavānaṃ khayo hotīti. Ayaṃ tāvettha saṅkhepavaṇṇanā.