So kira tasmiṃyeva vihāre uddesaṃ gaṇhati, athassa gāme piṇḍāya carato visabhāgārammaṇe kileso uppajji, so taṃ vipassanāya vikkhambhetvā vihāraṃ agamāsi. Tassa supinantepi taṃ ārammaṇaṃ upaṭṭhāsi. So "ayaṃ kileso vaḍḍhitvā apāyasaṃvattaniko hotī"ti saṃvegaṃ janetvā ācariyaṃ āpucchitvā vihārā nikkhamma mahāsaṅgharakkhitattherassa santike rāgapaṭipakkhaṃ asubhakammaṭṭhānaṃ gahetvā gumbantaraṃ pavisitvā paṃsukūlacīvaraṃ pattharitvā nisajja anāgāmimaggena pañcakāmaguṇikarāgaṃ chinditvā uṭṭhāya ācariyaṃ vanditvā punadivase uddesamaggaṃ pāpuṇi. Ye pana vattamānānuppannā, tesaṃ paṭipattiyā pahānaṃ nāma natthi.

[16] Idāni "uppannā ca āsavā pahiyyantī"ti idameva padaṃ gahetvā ye te āsavā pahiyyanti, tesaṃ nānappakārato aññaṃpi pahānakāraṇaṃ āvīkātuṃ desanaṃ vitthārento atthi bhikkhave āsavā dassanā pahātabbāti ādimāha yathātaṃ desanāppabhedakusalo dhammarājā. Tattha dassanā pahātabbāti dassanena pahātabbā. Esa nayo sabbattha.

Dassanāpahātabbaāsavavaṇṇanā

[17] Idāni tāni padāni anupubbato byākātukāmo "katame ca bhikkhave āsavā dassanā pahātabbā"ti pucchaṃ katvā mūlapariyāyavaṇṇanāya