@3 khu.u. 25/76/223 pāṭaligāmiyasutta

Kasmā pana tayo eva āsavā idha vuttāti. Vimokkhapaṭipakkhato. Appaṇihitavimokkhapaṭipakkho hi kāmāsavo, animittasuññatapaṭipakkhā itare. Tasmā ime tayo āsave uppādentā tiṇṇaṃ vimokkhānaṃ abhāgino honti, anuppādentā bhāginoti etamatthaṃ dassentena tayo eva vuttāti veditabbā. Diṭṭhāsavopi vā ettha vuttoyevāti vaṇṇitametaṃ.

Tassa amanasikaraṇīyānaṃ dhammānaṃ manasikārāti manasikārahetu, yasmā te dhamme manasikaroti, tasmāti vuttaṃ hoti. Esa nayo dutiyapadesu. "anuppannā ceva āsavā uppajjanti, uppannā ca āsavā pavaḍḍhantī"ti heṭṭhā vuttaāsavānaṃyeva abhedato nigamanametaṃ.