[18] Ettāvatā yo ayaṃ puggalādhiṭṭhānāya desanāya dassanāya pahātabbe āsave niddisituṃ assutavā puthujjano vutto, so yasmā "ayoniso bhikkhave manasikaroto anuppannā ceva āsavā uppajjantī"ti evaṃ sāmaññato vuttānaṃ ayoniso manasikārapaccayānaṃ kāmāsavādīnaṃpi adhiṭṭhānaṃ, tasmā tepi āsave teneva puggalena dassetvā idāni dassanāya pahātabbe āsave dassento so evaṃ ayoniso manasikaroti, ahosiṃ nu kho ahanti ādimāha. Vicikicchāsīsena cettha diṭṭhāsavaṃpi dassetuṃ imaṃ desanaṃ ārabhi.

Tassattho yassete iminā vuttanayena āsavā uppajjanti, so puthujjano yo cāyaṃ "assutavā"ti ādinā nayena vutto, so puthujjano evaṃ ayoniso anupāyena uppathena manasikaroti. Kathaṃ? ahosiṃ nu kho .p. So kuhiṃ gāmī bhavissatīti. Kiṃ vuttaṃ hoti, so evaṃ ayoniso manasikaroti, yathāssa "ahaṃ ahosiṃ nu kho"ti ādinā nayena vuttā soḷasavidhāpi vicikicchā uppajjati.

Tattha ahosiṃ nu kho na nu khoti sassatākārañca adhiccasamuppattiākārañca nissāya atītena attano vijjamānatañca avijjamānatañca kaṅkhati. Kiṃ kāraṇanti na vattabbaṃ. Ummattako viya bālaputhujjano yathā vā tathā vā pavattati. Apica

Evaṃ ayoniso manasikārassa pana kiṃ kāraṇanti. Sveva puthujjanabhāvo ariyānaṃ adassanādīni vā. Nanu ca puthujjanopi yoniso manasikarotīti. Kova evamāha manasikarotīti. Na pana tattha puthujjanabhāvo kāraṇaṃ, saddhammassavanakalyāṇamittatādīni tattha kāraṇāni. Na hi macchamaṃsādīni attano pakatiyā sugandhāni, abhisaṅkhārapaccayā pana sugandhānipi honti.