Tasmimpana sīlādīsu uppannesu dvārampi guttaṃ hoti, bhavaṅgampi āvajjanādīni vīthicittānipi. Yathā kiṃ, yathā nagaradvāresu saṃvutesu kiñcāpi antogharādayo asaṃvutā, tathāpi antonagare sabbaṃ bhaṇḍaṃ surakkhitaṃ sugopitameva hoti.

@2 Sī., i. voṭṭhapanakiccaṃ 3 cha.Ma., i. kareyyuṃ 4 cha.Ma., i. vīthicittānipīti Nagaradvāresu hi pidahitesu corānaṃ paveso natthi, evameva javane sīlādīsu uppannesu dvārampi suguttaṃ hoti, bhavaṅgampi āvajjanādīni vīthicittānipi. Tasmā javanakkhaṇe uppajjamānopi cakkhundriyasaṃvaroti vutto. Idha cāyaṃ satisaṃvaro adhippetoti veditabbo. Cakkhundriyasaṃvarena saṃvuto cakkhundriyasaṃvarasaṃvuto upetoti vuttaṃ hoti. Tathāhi pāṭimokkhasaṃvarasaṃvutoti imassa vibhaṅge "iminā pāṭimokkhasaṃvarena upepo hoti .pe. Samannāgato"ti vuttaṃ taṃ ekajjhaṃ katvā cakkhundriyasaṃvarena saṃvutoti evamatthato veditabbaṃ.

Athavā saṃvarīti saṃvuto, thakesi pidahīti vuttaṃ hoti. Cakkhundriye saṃvarasaṃvuto cakkhundriyasaṃvarasaṃvuto, cakkhundriyasaṃvarasaññitaṃ satikavāṭaṃ cakkhudvāre gharadvāre kavāṭaṃ viya saṃvari thakesi pidahīti vuttaṃ hoti. Ayameva cettha attho sundarataro. Tathāhi "cakkhundriyasaṃvaraṃ asaṃvutassa viharato saṃvutassa viharato"ti ettha dvīsu padesu ayameva attho dissatīti. Viharatīti evaṃ cakkhundriyasaṃvarasaṃvuto yena kenaci iriyāpathavihārena viharati. Yañhissāti ādimhi yaṃ cakkhundriyasaṃvaraṃ assa bhikkhuno asaṃvutassa athaketvā apidahitvā viharantassāti evamattho veditabbo. Athavā yekārassa yanti ādeso, hikāro ca padapūraṇo, ye assāti attho.