@3 cha.Ma. kaṇikārapadhāniyaghare 4 purāṇapotthake cittuppādāti dissati. taṃ pamādalekhaṃ

@bhaveyYu. ṭīkāyañhi pharaṇapītiyā uppādena sahevāti vuttaṃ.

Yo pana akkosanavasena dūrutte dūruttattāyeva ca dūrāgate api antimavatthusahite vacanapathe sutvā khantiguṇaṃyeva paccavekkhitvā na vedhati dīghabhāṇakaabhayatthero viya. Ayaṃ "khamo dūruttānaṃ dūrāgatānaṃ vacanapathānan"ti veditabbo.

Thero kira paccayasantosabhāvanārāmatāya mahāariyavaṃsapaṭipadaṃ kathesi, sabbo mahāgāmo āgacchati. Therassa mahāsakkāro uppajji. Taṃ aññataro mahāthero adhivāsetuṃ asakkonto dīghabhāṇako ariyavaṃsaṃ kathemīti sabbarattiṃ kolāhalaṃ karotīti ādīhi akkosi, ubhopi ca attano attano vihāraṃ gacchantā gāvutamattaṃ ekapathena agamaṃsu. Sakalagāvutampi so taṃ akkosiyeva. Tato yattha dvinnaṃ vihārānaṃ maggo bhijjati, tattha ṭhatvā dīghabhāṇakatthere taṃ vanditvā "esa bhante tumhākaṃ maggo"ti āha. So asuṇanto viya agamāsi, theropi vihāraṃ gantvā pāde pakkhāletvā nisīdi. Tamenaṃ antevāsiko "kiṃ bhante sakalagāvutaṃ paribhāsantaṃ na kiñci avocutthā"ti. Thero "khantiyeva āvuso mayhaṃ bhāro na akkhanti, ekapaduddhārepi kammaṭṭhānaviyogaṃ na passāmī"ti āha. Ettha ca vacanameva vacanapathoti veditabbo.