Kathampana taṃ tathā karotīti? anabhāvaṅgametīti anu anu abhāvaṅgameti, vikkhambhanappahānena yathā suvikkhambhito hoti, tathā karotīti vuttaṃ hoti. Esa nayo byāpādavihiṃsāvitakkesu.

Ettha ca kāmavitakkoti "yo kāmapaṭisaṃyutto takko vitakko micchāsaṅkappo"ti vibhaṅge vutto. Esa nayo itaresu. Uppannuppanneti uppanne uppanne, uppannamatteyevāti vuttaṃ hoti. Sakiṃ vā uppanne vinodetvā dutiyavāre ajjhupekkhitā na hoti, sattakkhattumpi uppannuppanne vinodetiyeva. Pāpake akusaleti lāmakaṭṭhena pāpake akosallatāya akusale. Dhammeti teyeva kāmavitakkādayo sabbepi vā nava mahāvitakke. Tattha tayo vuttā eva. Avasesā "ñātivitakko janapadavitakko amaravitakko parānuddayatāpaṭisaṃyutto vitakko lābhasakkārasilokapaṭisaṃyutto vitakko anavaññattipaṭisaṃyutto vitakko"ti ime cha.

Yañhissāti etesu vitakkesu yaṃ kiñci assa. Sesaṃ vuttanayameva hoti. Kāmavitakko panettha kāmāsavo eva. Tabbiseso bhavāsavo. Taṃsamupayutto diṭṭhāsavo. Sabbavitakkesu avijjā avijjāsavoti evaṃ āsavuppattipi veditabbā.