Tattha dhammadāyādā me bhikkhave bhavatha mā āmisadāyādāti dhammassa me dāyādā bhikkhave bhavatha, mā āmisassa. Yo mayhaṃ dhammo tassa paṭiggāhakā bhavatha. Yañca kho mayhaṃ āmisantassa mā paṭiggāhakā bhavathāti vuttaṃ hoti. Tattha dhammopi duvidho nippariyāyadhammo pariyāyadhammoti. Āmisampi duvidhaṃ nippariyāyāmisaṃ pariyāyāmisanti. Kathaṃ? maggaphalanibbānabhedo hi navavidhopi lokuttaradhammo nippariyāyadhammo nibbattitadhammoyeva, na kenaci pariyāyena kāraṇena vā lesena vā dhammo. Yampanidaṃ vivaṭṭūpanissitaṃ kusalaṃ, seyyathīdaṃ, idhekacco vivaṭṭaṃ patthento dānaṃ deti, sīlaṃ samādiyati, uposathakammaṃ karoti, gandhamālādīhi vatthupūjaṃ karoti, dhammaṃ suṇāti deseti, jhānasamāpattiyo nibbatteti, evaṃ karonto anupubbena nippariyāyadhammaṃ amataṃ nibbānaṃ paṭilabhati, ayaṃ pariyāyadhammo. Tathā cīvarādayo cattāro paccayā nippariyāyāmisameva, na aññena pariyāyena vā lesena vā āmisaṃ. Yampanidaṃ vaṭṭagāmikusalaṃ, seyyathīdaṃ, idhekacco vaṭṭaṃ patthento sampattibhavaṃ icchamāno dānaṃ deti .p. Samāpattiyo nibbatteti, evaṃ karonto anupubbena devasampattiṃ manussasampattiṃ paṭilabhati, idaṃ pariyāyāmisaṃ nāma.
Tattha nippariyāyadhammopi bhagavatoyeva santako. Bhagavatā hi kathitattā bhikkhū maggaphalanibbānāni adhigacchanti. Vuttampi cetaṃ "so hi brāhmaṇa bhagavā anuppannassa maggassa uppādetā, asañjātassa maggassa sañjānetā, anakkhātassa maggassa akkhātā, maggaññū maggavidū maggakovido, maggānugā ca pana etarahi sāvakā viharanti pacchā samannāgatā"ti ca "so hāvuso bhagavā jānaṃ jānāti passaṃ passati cakkhubhūto ñāṇabhūto dhammabhūto brahmabhūto vattā pavattā atthassa ninnetā amatassa dātā dhammassāmi tathāgato"ti ca.
Pariyāyadhammopi bhagavatoyeva santako. Bhagavatā hi kathitattā evaṃ jānanti "vivaṭṭaṃ patthetvā dānaṃ dento .pe. Samāpattiyo nibbattento anukkamena amataṃ nibbānaṃ paṭilabhatī"ti. Nippariyāyāmisampi ca bhagavatoyeva santakaṃ. Bhagavatā hi anuññātattāyeva bhikkhūhi jīvakavatthuṃ ādiṃ katvā paṇītacīvaraṃ laddhaṃ. Yathāha "anujānāmi bhikkhave gahapaticīvaraṃ, yo icchati paṃsukūliko hotu, yo icchati, gahapaticīvaraṃ sādiyatu, itarītarena cāhaṃ bhikkhave santuṭṭhiṃyeva vaṇṇemī"ti.