Yesañca dhammānanti lobhādayo sandhāyāha, ye parato "tatrāvuso lobho ca pāpako"ti ādinā nayena vakkhati. Nappajahantīti na pariccajanti, cittavivekaṃ na paripūrentīti vuttaṃ hoti. Bāhullikāti cīvarādibāhullāya paṭipannā. Sāsanaṃ sithilaṃ gaṇhantīti sāthilikā. Okkamane pubbaṅgamāti ettha okkamanaṃ vuccati adhogamanaṭṭhena pañca nīvaraṇāni, tena pañcanīvaraṇapūraṇena pubbaṅgamāti vuttaṃ hoti. Paviveketi upadhiviveke nibbāne. Nikkhittadhūrāti oropitadhūrā, tadadhigamāya ārambhaṃpi akurumānāti, ettāvatā upadhivivekaṃ na paripūrentīti vuttaṃ hoti.

Ettāvatā aniyameneva vatvā idāni desanaṃ niyamento "tatrāvuso"ti ādimāha, kasmā? sāvakā "tīhi ṭhānehī"ti evañhi aniyametvāva vuccamāne "tampi aññe bhaṇati, na amhe"ti udāsīnāpi honti. "therā navā majjhimā"ti evampana niyametvā vuccamāne amhe bhaṇatīti ādaraṃ karonti. Yathā rañño "amaccehi nagaravīthiyo sodhetabbā"ti vuttepi "kena nukho sodhetabbā"ti maññamānā na sodhenti, attano attano gharadvāraṃ sodhetabbanti pana bheriyā nikkhamantāya sabbe muhuttena sodhenti ca alaṅkaronti ca evaṃ sampadamidaṃ veditabbaṃ.

Tattha tatrāti tesu sāvakesu. Therāti dasavasse upādāya vuccanti. Tīhi ṭhānehīti tīhi kāraṇehi. Ayañhi ṭhānasaddo issariyaṭṭhitikhaṇakāraṇesu dissati. "kiṃ panāyasmā devānamindo kammaṃ katvā imaṃ ṭhānaṃ patto"ti ādīsu hi issariye dissati. "ṭhānakusalo hoti akkhaṇavedhī"ti ādīsu ṭhitiyaṃ. "ṭhānasovetaṃ tathāgataṃ paṭibhātī"ti ādīsu khaṇe. "ṭhānañca ṭhānato aṭṭhānañca aṭṭhānato"ti ādīsu kāraṇe. Idha pana kāraṇeyeva. Kāraṇañhi yasmā tattha phalaṃ tiṭṭhati tadāyattavuttibhāvena, tasmā ṭhānanti vuccati.